پاکستان بھر میں کورونا وائرس سے ہلاکتوں کی تعداد 26 ہوگئی ہے جب کہ مزید کیس سامنے آنے کے بعد متاثرہ افراد کی تعداد 2081 تک جا پہنچی ہے۔
منگل کو پاکستان میں کورونا سے 3 ہلاکتیں ہوئیں جن میں سے سندھ میں 2 اور خیبرپختونخوا میں ایک ہلاکت ہوئی۔
پاکستان میں اب تک ہونے والی ہلاکتوں میں سے پنجاب میں 9، سندھ 8، خیبرپختونخوا 6، بلوچستان ایک اور گلگت بلتستان میں 2 ہلاکتیں ہوچکی ہیں۔
[pullquote]پاکستان میں آج کے کیسز کی صورتحال[/pullquote]
پاکستان میں آج اب تک کورونا وائرس کے 48 کیسز رپورٹ ہوئے ہیں۔
[pullquote]پنجاب[/pullquote]
پنجاب میں آج بروز بروز بدھ کورونا وائرس کے مزید 32 کیسز سامنے آئے ہیں جس کی تصدیق صوبائی ترجمان مسرت چیمہ کی جانب سے کی گئی ہے، پنجاب میں نئے کیسز کے بعد مجموعی تعداد 740 ہوگئی ہے۔
لاہور میں کورونا وائرس کے 159 مریض ہیں جب کہ ڈی جی خان سے207 زائرین اور ملتان میں 91 زائرین میں کورونا کی تصدیق ہوئی۔
اس کے علاوہ رائے ونڈ قرنطینہ میں41، فیصل آباد 5، راولپنڈی 46، جہلم 28 اور گجرات میں کورونا وائرس کے 86 مریض ہیں۔
اس کے علاوہ ننکانہ میں 13، گوجرانوالہ 12، منڈی بہاؤالدین 4 جب کہ اٹک اور قصور میں ایک ایک کیس ہے۔
ادھر پنجاب پرائمری اینڈ سیکنڈری ہیلتھ کیئر کے مطابق صوبے میں کورونا سے ہلاکتوں کی تعداد 9 ہے جب کہ 5 مریض صحت یاب ہوچکے ہیں۔
پنجاب میں اب تک کورونا سے 9 ہلاکتوں میں سے لاہور میں 4، راولپنڈی 3 جب کہ رحیم یار خان اور فیصل آباد میں ایک ایک ہلاکت ہوئی ہے۔
[pullquote]سندھ[/pullquote]
سندھ میں آج بروز بدھ کورونا وائرس کے مزید 3 کیسز رپورٹ ہوئے ہیں تاہم محکمہ صحت کی سمری میں ان کیسز کی نشاندہی نہیں کی گئی اور مجموعی نمبر 676 سے 679 بتایا گیا ہے جب کہ صوبے میں اب تک ہلاکتوں کی تعداد 8 ہے۔
صوبائی محکمہ صحت کی سمری کے مطابق صوبے میں کیسز کی مجموعی تعداد 679 ہوگئی ہے جن میں سے کراچی سے کوئی نیا کیس سامنے نہیں آیا۔
محکمہ صحت کے مطابق کراچی میں کیسز کی تعداد 274 اور حیدرآباد میں 131 ہے جب کہ دادو اور جیکب آباد میں ایک ایک کیس ہے۔
اس کے علاوہ سکھر میں کورونا میں مبتلا زائرین کی تعداد 265 اور لاڑکانہ میں 7 ہے۔
ترجمان سندھ حکومت مرتضیٰ وہاب نے بتایا کہ سندھ میں کورونا سے مزید 3 مریض صحت یاب ہوگئے ہیں جس کے بعد صوبے میں اب تک صحت یاب ہونے والوں کی تعداد 54 ہوگئی ہے تاہم مرتضیٰ وہاب کی جانب سے یہ نشاندہی نہیں کی گئی کہ مزید 3 صحت یاب افراد کا تعلق کس شہر سے ہے۔
خیال رہے کہ اس سے قبل سندھ میں کورونا سے صحت یاب ہونے والوں کی تعداد 51 تھی جن میں سے 27 کراچی، ایک حیدرآباد اور سکھر میں 23 مریض ہیں۔
[pullquote]بلوچستان[/pullquote]
بلوچستان میں آج بروز بدھ کورونا وائرس کے مزید 4 کیسز رپورٹ ہوئے ہیں جس کی تصدیق صوبائی ترجمان لیاقت شاہوانی نے کی۔
صوبے میں کیسز کی مجموعی تعداد 158 ہوگئی ہے۔
بلوچستان حکومت کے ترجمان لیاقت شاہوانی نے بتایا کہ صوبے میں ایک روز میں مزید 17 افراد صحت یاب ہوئے ہیں جس کے بعد مجموعی طور پر صوبے میں صحت یاب ہونے والوں کی تعداد 19 ہوگئی ہے۔
[pullquote]گلگت بلتستان[/pullquote]
گلگت بلتستان میں آج بروز بدھ کورونا وائرس کے مزید 6 کیسز سامنے آئے ہیں جو سرکاری پورٹل پر رپورٹ کیے گئے ہیں۔
سرکاری پورٹل کے مطابق علاقے میں کیسز کی مجموعی تعداد 184 ہوگئی ہے۔
دوسری جانب مشیر اطلاعات گلگت بلتستان کا کہنا ہےکہ علاقے میں 36 نئے کیسز سامنے آنے کے بعد کیسز کی مجموعی تعداد 183 ہے۔
مشیر اطلاعات نے بتایا کہ نگر میں 16،کھرمنگ 10،اسکردو 6 اور شگر میں 4 نئے کیسز سامنے آئے ہیں۔
اس طرح مشیر اطلاعات اور سرکاری پورٹل کے کیسز میں ایک نمبر کا فرق ہے۔
مشیر اطلاعات نے بتایا کہ گلگت میں کورونا وائرس کے متاثرہ مریضوں میں 84 خواتین شامل ہیں جب کہ 67 کیسز کے ساتھ ضلع نگر سب سے زیادہ متاثر ہوا ہے۔
گلگت بلتستان میں اب تک کورونا وائرس سے 2 افراد جاں بحق ہوچکے ہیں جن میں سے ایک وائرس کی تشخیص کرنے والے ڈاکٹر اسامہ ہیں جب کہ ایک کا تعلق محکمہ صحت سے تھا۔
گلگت بلتستان میں اب تک کورونا وائرس سے 6 مریض صحت یاب ہوچکے ہیں۔
[pullquote]آزاد کشمیر[/pullquote]
آزاد کشمیر میں کورونا وائرس کے مزید 3 کیسز سامنے آئے ہیں جس بعد کیسز کی مجموعی تعداد 9 ہوگئی۔
آزاد کشمیر کےوزیر صحت نے کیسز کی تصدیق کی جب کہ ڈپٹی کمشنر سردار خالد محمود نے بتایا کہ کورونا کے 2 مریضوں کا تعلق بھمبر سے ہے جن میں سے ایک 12 سال کی بچی اور ایک برطانیہ سے آنے والا شہری وائرس میں مبتلا ہے۔
ڈپٹی کمشنر کے مطابق تراڑ کھل سندھوتی میں بھی ایک شخص میں کوروناکا ٹیسٹ مثبت آیاہے۔
واضح رہے کہ آزاد کشمیر میں بھی کورونا وائرس کا پھیلاؤ روکنے کے لیے 24 مارچ سے تین ہفتوں کے لیے لاک ڈاؤن ہے۔
[pullquote]خیبرپختونخوا[/pullquote]
گزشتہ روز منگل کو خیبرپختونخوا میں کورونا وائرس سے ایک ہلاکت رپورٹ ہوئی جس کے بعد صوبے میں ہلاکتوں کی تعداد 6 ہوگئی ہے۔
صوبائی حکومت کے فوکل پرسن نے صوبے میں اموات کی تعداد 6 ہونے کی تصدیق کرتے ہوئے بتایا کہ ایک ہفتے قبل انتقال کر جانے والے شخص کی رپورٹ گزشتہ روز موصول ہوئی جس میں کورونا کی تصدیق ہوئی۔
دوسری جانب گزشتہ روز صوبے میں 32 نئے کیسز رپورٹ ہوئے جس کے بعد متاثرہ مریضوں کی تعداد 253 تک جاپہنچی ہے۔
محکمہ صحت کے ترجمان کے مطابق گزشتہ 24 گھنٹوں کے دوران پشاور اور کوہاٹ میں 10، 10، ڈیرہ اسماعیل خان میں 3، مردان، کرم، ہری پور اور باجوڑ میں ایک ایک مریض میں مہلک وائرس کی تصدیق ہوئی۔
اس کے علاوہ ایران سے واپس ڈی آئی خان آنے والے زائرین میں مزید 4 اور کرم میں ایک شخص میں مہلک وائرس کی تصدیق ہوئی۔
واضح رہےکہ کے پی میں اب تک مہلک وائرس کے 2 مریض صحت یاب ہوئے جنہیں اسپتال سے فارغ کر دیا گیا ہے۔
[pullquote]اسلام آباد[/pullquote]
سرکاری پورٹل کے مطابق اسلام آباد میں منگل کو کورونا وائرس کے 7 کیسز رپورٹ ہوئے جس کے بعد وفاقی دارالحکومت میں مجموعی تعداد 58 ہوگئی ہے۔
[pullquote]ملک بھر میں لاک ڈاؤن[/pullquote]
پاکستان میں کورونا وائرس سے متاثرہ افراد کی تعداد میں مسلسل اضافے کے بعد چاروں صوبوں میں لاک ڈاؤن ہے اور ملک بھر میں فوج تعینات ہے۔ مزید پڑھیں۔۔
آزاد کشمیر میں بھی 24 مارچ سے 3 ہفتوں کا لاک ڈاؤن کیا گیا ہے۔
[pullquote]ملک بھر میں تمام مسافر ٹرینیں بند[/pullquote]
وزارت ریلوے نے 24 مارچ کی رات 12 بجے سے ملک بھر میں ٹرین آپریشن معطل کر رکھا ہے جس کے تحت 31 مارچ تک مسافر ٹرینیں بند رہیں گی۔ مزید پڑھیں۔۔
[pullquote]کورونا جنگ عظیم دوئم کے بعد بدترین بحران قرار [/pullquote]
اقوام متحدہ نے دنیا بھر میں پھیلے کورونا وائرس کو جنگ عظیم دوئم کے بعد بدترین بحران قرار دیا ہے۔
اقوام متحدہ کے سیکرٹری جنرل انتونیو گوتریس کا کہنا ہے کہ کورونا وائرس کے باعث دنیا کی موجودہ صورت حال جنگ عظیم دوئم کے بعد پیدا ہونے والی بدترین صورت حال کا منظر پیش کر رہی ہے۔
[pullquote]1200 ارب کے ریلیف پیکیج کی منظوری[/pullquote]
وفاقی کابینہ نے کورونا ریلیف فنڈز کے لیے 1200 ارب روپے کے ریلیف پیکیج کی منظوری دے دی۔ مزید پڑھیں۔۔
[pullquote]’پنجاب کورونا کی ویکسین تیارکرنے والا پہلا صوبہ ہوگا‘[/pullquote]
وزیراعلیٰ پنجاب عثمان بزدار نے دعویٰ کیا ہےکہ کورونا وائرس پر ریسرچ کے لیے تمام تر وسائل فراہم کیے جائیں گے، پنجاب مقامی سطح پرکورونا وائرس کی ویکسین تیارکرنے والا پہلا صوبہ ہوگا۔
[pullquote]سندھ اور پنجاب میں باجماعات نماز پر پابندی[/pullquote]
کورونا وائرس کے پھیلاؤ کو روکنے کے لیے سندھ حکومت نے صوبے بھر کی مساجد میں نماز کے اجتماعات پر پابندی عائد کر رکھی ہے جو 5 اپریل تک ہو گی۔
پنجاب حکومت نے بھی اس سلسلے میں ایک حکم نا مہ جاری کرتے ہوئے مساجد میں نمازیوں کی تعداد محدود کرتے ہوئے اجتماعات پر پابندی لگا دی۔
[pullquote]علمائے کرام کی عوام کو توبہ استغفار کرنے کی تلقین[/pullquote]
ملک کے جید علمائے کرام نے فتویٰ دیا ہے کہ وبا سے احتیاطی تدابیر کو اپنانا نبیﷺ کی سنّت ہے اور توبہ استغفار کے بغیر کورونا وائرس سے چھٹکارا ممکن نہیں۔
[pullquote]کورونا سے انتقال کرنیوالوں کو تابوت میں دفنانے کی ہدایت[/pullquote]
خیبر پختونخوا کے محکمہ ریلیف و بحالی نے کورونا وائرس سے انتقال کرنے والے افراد کی تدفین سے متعلق گائیڈ لائنز جاری کی ہیں جس میں وائرس سے انتقال کرنے والوں کا غسل اور تدفین کرنے والوں کو ماسک، دستانے اور دیگر حفاظتی تدایبر اختیار کرنے کی ہدایت کی گئی ہے۔
اعلامیے کے مطابق کورونا وائرس سے انتقال کرنے والوں کو پلاسٹک کور میں بند کرکے تابوت میں دفن کیا جائے، غسل کے دوران استعمال ہونے والی اشیاء کو فوری تلف کیا جائے جب کہ قریبی رشتہ داروں کو میت تابوت کے گلاس پین ونڈو میں دیکھنے کی اجازت ہوگی۔
