گزشتہ ماہ کراچی میں مارکنگز پبلشنگ کی جانب سے ان کے نویں ٹائٹل اور پہلے میوزک- بک البم ‘اسماعیل کا اردو شہر’ کی تقریب رونمائی ہوئی۔
اسماعیل کا اردو شہر پاکستان میں ناول، میوزک البم، اور میوزک ویڈیو کو ایک ساتھ ریلیز کرنے کی پہلی کاوش ہے۔
اسماعیل کا اردو شہر ایک سائنس فکشن ناول ہے جسے زوہیب قاضی نے تحریر کیا ہے۔
زوہیب ایک باصلاحیت موسیقار بھی ہیں۔ اس ہی لیے انھوں نے ناول کے اسباق سے متاثر ہوکر ایک ساؤنڈ ٹریک البم بھی ترتیب دیا ہے جس میں جعفر زیدی، زو وساجی، سارہ حیدر، عباس علی خان، سمرہ خان، عمران شفیق اور گمبی نے اپنی فنی خدمات دی ہیں ۔
تقریب میں میوزک البم سے ذوہیب قاضی اور سارہ حیدر نے کچھ گانوں پر لائو میوزک کے ساتھ پرفارم بھی کیا۔
اس کے بعد اس البم کے گانے پر مشتمل ایک میوزک ویڈیو ‘ ویک اپ/جاگو’ کا ورلڈ پریمئر بھی کیا گیا۔
تقریب میں ٹیلیویژن کے معروف اداکاروں عدنان ملک اور ثروت گیلانی نے ناول کے منتخب حصوں کو ناظرین کے سامنے با آواز بلند پڑھا۔
اس موقع پر میڈیا، شوبزنس اور دیگر سماجی حلقوں کی معروف شخصیات بھی موجود تھیں۔
مارکنگز پبلشنگ کی روح رواں کرن امان نے اس موقع پر کہا کہ ’مارکنگز پبلشنگ کا آغاز اظہار رائے کو مثبت فروغ دینے کے ویژن کے ساتھ کیا گیا تھا۔اور ہمیں کئی جرائت مندانہ خیالات کی ابتدا کرنے پر فخر ہے۔‘
تقریب کے آخرمیں حاضرین نے زوہیب قاضی کے ساتھ بات چیت کی اور ان کے ناول کو ان کے دستخط کے ساتھ خریدا۔
تقریب کی پبلک ریلیشننگ کے انتظامات لوٹس پی آر نے کئے تھے۔
