ہنر کدہ فلمز اور سومٹ انٹرٹینمنٹ کی جانب سے فلم ’ریوینج آف ورتھ لیس‘ معنی ’بدلہ‘ ۲۲ جولائی ۲۰۱۶ کو ریلیز کے لیے تیار ہے۔
اس سلسلے میں کراچی کے مقامی ہوٹل میں ایک پریس کانفرنس کے دوران فلم کے ٹریلر اور موسیقی کی لانچ کے علاوہ فلم کی کاسٹ اور ہدایت کار نے میڈیا سے ملاقات کی۔
میڈیا سے بات کرتے ہوئے فلم کے ہدایت کار جمال شاہ نے بتایا کہ فلم کا مقصد پاکستان کے شمالی قبائلی علاقوں میں پاکستانی فوج کے آپریشن ضرب عضب کی حمایت کرنا ہے۔
جمال شاہ نے مزید بتایا کہ انھوں نے یہ فلم ۲۰۰۹ میں سوات میں دہشت گردی کے خلاف فوجی آپریشن سے متاثر ہو کر شروع کی تھی۔ ابتدا ’روڈ ٹو سوات‘ نامی ایک دستاویزی فلم سے ہوئی جسے بعد میں ایک فیچر فلم کی شکل دے دی گئی۔ جمال شاہ کا کہنا تھا کہ دستاویزی فلم کی پہنچ محدود لوگوں تک ہوتی ہے جبکہ سینما میں لگی فیچر فلم کو لوگوں کی بڑی تعداد دیکھنے جاتی ہے۔
فلمسازوں کے مطابق فلم کی کہانی سچے واقعات پر مبنی ہے جس میں زرک خان نامی ایک شخص کا خاندان سوات میں خانہ جنگی کے دوران نقل مکانی سے انکار کردیتا ہے اور وہیں رہ کر اپنی جنگ لڑتے ہیں۔
فلم کی کہانی اور ہدایات جمال شاہ کی ہیں جبکہ پروڈیوسر آمنہ شاہ ہیں۔ اہم کاسٹ میں جمال شاہ، فردوس جمال، شامل خان، ایمل کورکاسے، ایوب کھوسو، مائرہ خان، مائدہ رضا، قمر عباس اور نوربخاری کے علاوہ ہنرکدہ کالج آف ویژوئل اینڈ پرفارمنگ آرٹس طلبا بھی شامل ہیں۔
فلم میں جمال شاہ کی آواز میں ایک گانا بھی شامل ہے۔ ڈھائی گھنٹے کے دورانیے پر مشتمل یہ فلم ۲۲ جولائی بروز جمعہ ملک بھر کے سینماؤں میں لگا دی جائے گی۔