ڈونلڈ ٹرمپ نے اینجلا مرکل سے ہاتھ ملانے سے انکار کردیا

واشنگٹن: امریکی صدر ڈونلڈ ٹرمپ نے دنیا کی طاقتور ترین خواتین میں شمار ہونے والی اور امریکا کے اہم اتحادی ملک جرمنی کی سربراہ اینجلا مرکل سے ایک موقع پر ہاتھ ملانے سے انکار کردیا۔

جرمن چانسلر انجلا مرکل ان دنوں امریکی دورے پر ہیں، یہ جرمن چانلسر کا ڈونلڈ ٹرمپ کے دور کا پہلا دورہ ہے، اس دورے پر یورپی اور مغربی میڈیا کی خاص نظر ہے۔

جرمن چانسلر 16 مارچ کو امریکا پہنچیں تھی۔

غیر ملکی خبر رساں ادارے’ رائٹرز‘ کے مطابق جرمن چانسلر اینجلا مرکل امریکی صدر ڈونلڈ ٹرمپ سے ملاقات کے لیے وائیٹ ہاؤس پہنچیں۔

دونوں رہنماؤں کے درمیان قریبا 30 منٹ تک دو طرفہ مذاکرات، تجارت، نیٹو اتحاد سے متعلق معاملات سمیت دیگر معاملات پر تفصیلی بات چیت ہوئی۔

اس موقع پر دونوں رہنماؤں نے میڈیا سے بھی تفصیلی بات کی، اور اس دوران اینجلا مرکل اور ڈونلڈ ٹرمپ نے ایک دوسرے سے ہاتھ بھی ملایا۔

بعد ازاں دونوں رہنما وائیٹ ہاؤس میں موجود’اوول آفیس‘ پہنچے، جہاں پہلے سے ہی میڈیا موجود تھا۔

خبر رساں ادارے کے مطابق اوول آفیس میں بظاہر ڈونلڈ ٹرمپ نے اینجلا مرکل سے مصافحہ کرنے سے انکار کردیا یا اسے غیر اہم سمجھا، امریکی صدر نے جرمن چانسلر سے اوول آفیس میں ہاتھ بھی نہیں ملایا۔

امریکی میڈیا میں چلنے والی وڈیوز میں دونوں رہنماؤں کو ایک دوسرے کے قریب بیٹھے دیکھا جاسکتا ہے، جب کہ وڈیو میں ایک سے زائد مرتبہ اینجلا مرکل امریکی صدر سے بات کرنے کی کوشش کرتی ہوئی دکھائی دیتی ہیں، مگر ڈونلڈ ٹرمپ ان کی اس کوشش کو ایمیت نہیں دیتے۔

امریکی میڈیا میں چھپنے والی خبروں کے مطابق اینجلا مرکل نے بظاہر ڈونلڈ ٹرمپ کو ہاتھ ملانے کے لیے بھی کہا، مگر انہوں نے انکار کردیا۔

اس موقع سے پہلے دونوں رہنما وائیٹ ہاؤس میں ہونے والی ملاقات میں ہاتھ ملا چکے تھے۔

یورپ کی آواز

دونوں رہنماؤں کے درمیان ہونے والی ملاقات اور اس کے بعد کی جانے والی مشترکہ پریس کانفرنس میں بظاہر امریکی صدر ڈونلڈ ٹرمپ اور اینجلا مرکل میں کئی باتوں پر اتفاق رائے دکھائی نہیں دیا۔

صدر ڈونلڈ ٹرمپ نے نارتھ ائٹلانٹک ٹریٹی آرگنائیزیشن (نیٹو)سمیت یورپی رہنماؤں اور عہدیداروں کو تنقید کا نشانہ بھی بنایا۔

اینجلا مرکل اور ڈونلڈ ٹرمپ کے درمیان مہاجرین کے معاملے سے لے کر آزاد تجارت پر بھی اتفاق دیکھنے میں نہیں آیا۔

امریکی صدر ڈونلڈ ٹرمپ نے بحر اوقیانوس کے آر پار آزاد تجارت پر زور دیتے ہوئے کہا کہ وہ آزاد کاروباری شخص ہیں اور آزاد اور شفاف تجارت پر یقین رکھتے ہیں۔

امریکی صدر کا آزاد تجارت کے حوالے سے تمام یورپی ممالک سے انفرادی معاہدوں کے تحت کاروبار کی جانب اشارہ تھا، جسے جرمن چانسلر اینجلا مرکل نے مسترد کردیا۔

جرمن چانلسر نے یورپی یونین اور امریکا کے دو طرفہ تعلقات سے الگ ہوکر آزاد تجارت کی تجویز کو مسترد کیا اور امید ظاہر کی کہ یورپی یونین اور امریکا اس مسئلے کو مذاکرات کے ذریعے حل کرنے میں کامیاب ہو جائیں گے۔

Facebook
Twitter
LinkedIn
Print
Email
WhatsApp

Never miss any important news. Subscribe to our newsletter.

مزید تحاریر

تجزیے و تبصرے