’بینک آف چائینا جلد گوادر میں برانچ قائم کرے گا‘

گوادرپورٹ اتھارٹی کے چیئرمین دوستین خان جمالدینی کا کہنا ہے کہ بینک آف چائینا سمیت دیگر مقامی اور بین الاقوامی بینکس گوادر میں اپنی برانچز کھولنے کا منصوبہ بنارہے ہیں۔

گوادر پورٹ اتھارٹی کے چیئرمین دوستین خان جمالدینی نے سمٹ بینک کے صدر ظہیر اسماعیل سے ملاقات کے دوران دعویٰ کیا کہ گوادر کے گہرے سمندر کے پورٹ نے کام کا آغاز کردیا ہے جبکہ متعدد کمرشل بینکس پورٹ شہر میں اپنی برانچز قائم کرنے میں دلچسپی رکھتے ہیں اور بینک آف چائینا برانچ کے قیام سے جلد گوادر میں اپنا بزنس شروع کرنے والا ہے۔

انہوں نے کہا کہ ’گوادر میں ملکی اور غیر ملکی بینکوں کی برانچز کے قیام کے ساتھ ہی تجارتی اور بزنس سرگرمیوں کا آغاز ہوجائے گا‘۔

ان کا مزید کہنا تھا کہ اب تک گوادر پورٹ اورسیز اینڈ پورٹ ہولڈنگ کی جانب سے دو بینکس کو یہاں کام کی اجازت دی ہے جس میں ایک بینک آف چائینا بھی شامل ہے۔

چیئرمین نے دعویٰ کیا کہ گوادر فری زون پر کام کا آغاز ہوچکا ہے اور یہ تعمیراتی کام آئندہ کچھ ماہ میں مکمل ہوجائے گا۔

دوستین خان جمالدینی نے مزید کہا کہ گوادر فری زون کی تعمیرات کو جلد مکمل کرنے کے لیے پاکستانی اور چینی شہری 3 شفٹوں میں کام کررہے ہیں۔

انہوں نے انکشاف کیا کہ رواں سال دسمبر کے پہلے ہفتے میں وزیراعظم شاہد خاقان عباسی، چینی وزراء کے ہمراہ مذکورہ فری زون میں پہلے بین لااقوامی ایکسپو سینٹر کی تقریب رونمائی میں شرکت کریں گے، جس میں 100 سے زائد چینی کمپنیوں کی شرکت متوقع ہے۔

اس موقع پر ظہیر اسماعیل نے چیئرمین کو بتایا کہ رواں سال ستمبر میں سمٹ بینک اور سندھ بینک ضم ہوجائیں گے جس کے بعد یہ پاکستان کا دوسرا بڑا بینکنگ سسٹم بن جائے گا۔

انہوں ںے کہا کہ سمٹ بینک سماجی شعبے میں دلچپسی رکھتا ہے اور جلد حکومت کے ملازمین، چھوٹے کاروباری حضرات اور مچھیرں کو ان کے کاروبار کو فروغ دینے کے لیے آسان شرائط پر قرضے فراہم کریں گے۔

Facebook
Twitter
LinkedIn
Print
Email
WhatsApp

Never miss any important news. Subscribe to our newsletter.

مزید تحاریر

تجزیے و تبصرے