پاکستان مسلم لیگ (ن) کی جانب سے شیخوپورہ میں ہونے والے جلسے سے قبل مریم نواز کو پہنانے کے لیے 7 تولہ سونے کا تاج تیار کرلیا گیا، جس کی مالیت 13 لاکھ روپے بتائی جاتی ہے۔
رپورٹ کے مطابق 7 تولہ سونے سے بنے اس شاہی تاج کو مرکزی انجمن تاجران کے صدر میاں پرویز کی جانب سے تیار کیا گیا ہے۔
واضح رہے کہ مسلم لیگ (ن) لودھراں اور مانسہرہ کے بعد اتوار 18 فروری کو شیخوپورہ کے کمپنی باغ میں سیاسی قوت کا مظاہرہ کرے گی۔
شیخوپورہ میں ہونے والے اس جلسے میں سابق وزیر اعظم نواز شریف اور مریم نواز بھی خطاب کریں گی جبکہ اس سلسلے میں جلسہ گاہ میں لیگی قائدین کے استقبال کے لیے بڑے پینافلیکس بھی لگا دیئے گئے ہیں۔
مرکزی انجمن تاجران کے صدر کی جانب سے تیار کردہ اس تاج میں 7 تولہ سونے کے علاوہ 1 ہیرہ بھی نصب کیا گیا ہے جو مریم نواز کی آمد پر انہیں پہنایا جائے گا۔
خیال رہے کہ گزشتہ کچھ دنوں سے مسلم لیگ (ن) کی جانب سے عوامی رابطہ مہم کا آغاز کیا ہوا ہے اور اس سلسلے میں ملک کے مختلف شہروں میں سیاسی جلسے اور سوشل میڈیا کنونشن منعقد کیے جاتے رہیں ہیں۔
ان سیاسی جلسوں میں جو اہم بات رہی وہ یہ ہے کہ مسلم لیگ (ن) کے قائد نواز شریف اور ان کی صاحبزادی مریم نواز کی جانب سے نہ صرف اپنے مخالفین بلکہ عدلیہ کے خلاف بھی بیان بازی کی جاتی رہی ہے۔
