عامر لیاقت تحریک انصاف میں شمولیت اختیار کررہے ہیں، عمران اسماعیل

پاکستان تحریک انصاف کے رہنما عمران اسماعیل نے دعویٰ کیا ہے کہ ایم کیو ایم کے سابق رہنما اور ٹی وی اینکر عامر لیاقت حسین تحریک انصاف میں شمولیت اختیار کررہے ہیں۔

نجی ٹی وی چینل سے گفتگو کرتے ہوئے تحریک انصاف کے رہنما عمران اسماعیل نے کہا کہ عامر لیاقت حسین پیر کے روز چیئرمین تحریک انصاف عمران خان کے ساتھ پریس کانفرنس میں پی ٹی آئی میں شامل ہونے کا اعلان کریں گے۔

22 اگست 2016 کو بانی متحدہ قومی موومنٹ کی پاکستان مخالف تقریر کے بعد قانون نافذ کرنے والے اداروں نے ایم کیو ایم کے کارکنوں اور رہنماؤں کے خلاف کارروائی کی تھی اور فاروق ستار، عامر لیاقت حسین و دیگر رہنماؤں کو رینجرز نے حراست میں لے لیا تھا۔

اگلے روز یعنی 23 اگست کو عامر لیاقت نے سیاست سے کنارہ کشی کا اعلان کردیا تھا اور کہا تھا کہ ان کا ایم کیو ایم سمیت کسی جماعت سے کوئی تعلق نہیں۔

خیال رہے کہ جیسے جیسے موجودہ حکومت کی آئینی مدت کے ختم ہونے کا وقت قریب آرہا ہے سیاسی جماعتوں کے درمیان رسہ کشی میں بھی اضافہ ہورہا ہے اور سیاستدان ہوا کا رخ دیکھ کر اپنے مستقبل کا فیصلہ کررہے ہیں۔

گزشتہ دنوں حکمراں جماعت پاکستان مسلم لیگ (ن) کے رکن صوبائی اسمبلی نصر اللہ گھمن بھی پی ٹی آئی میں شامل ہوگئے تھے جبکہ ان کے متعدد حامیوں نے بھی پی ٹی آئی میں شمولیت کا اعلان کیا تھا۔

گزشتہ 20 روز کے دوران نصر اللہ گھمن سمیت ن لیگ کے چار ارکان اسمبلی پی ٹی آئی میں شمولیت کا اعلان کرچکے ہیں۔

Facebook
Twitter
LinkedIn
Print
Email
WhatsApp

Never miss any important news. Subscribe to our newsletter.

مزید تحاریر

تجزیے و تبصرے