پشاور: اقلیتی سماجی رضاکار چرن جیت سنگھ کے قتل کا ’ملزم‘ گرفتار

پشاور پولیس کے محکمہ انسداد دہشت گردی (سی ٹی ڈی) نے سماجی رضاکار اور اقلیتی رکن چرن جیت سنگھ کے قتل میں ملوث مبینہ ملزم کو گرفتار کرلیا۔

پولیس کے جاری بیان کے مطابق ملزم کو کوہاٹ روڈ پر قائم غلہ منڈی سے گرفتار کیا گیا۔

پولیس کے مطابق ملزم نے دوران تفتیش قتل میں ملوث دیگر ملزمان سے متعلق اہم انکشافات کیے۔

ان کا کہنا تھا کہ مزید ملزمان کی گرفتاری کے لیے سی ٹی ڈی کی ٹیم تشکیل دے دی گئی۔

پولیس کے مطابق گرفتار ملزم کی شناخت شہر یار ولد سلطان کے نام سے ہوئی، جو بڈھ بیر کا رہائشی ہے۔

پولیس کا کہنا تھا کہ تفتیشی ٹیم نے جدید سائنسی خطوط پر کارروائی کرتے ہوئے ملزم کا سراغ لگایا۔

خیال رہے کہ 29 مئی 2018 کو نامعلوم افراد نے پشاور میں سرکی گیٹ پر سماجی رضاکار اور اقلیتی رکن چرن جیت سنگھ کو ٹارگٹ کلنگ کا نشانہ بنایا تھا۔

واقعے کا مقدمہ انسداد دہشت گردی ایکٹ 1997 کے تحت درج کیا گیا تھا جبکہ واقعے کی تحقیقات کے لیے محکمہ انسداد دہشت گردی پشاور نے خصوصی تفتیشی ٹیم تشکیل دی تھی۔

Facebook
Twitter
LinkedIn
Print
Email
WhatsApp

Never miss any important news. Subscribe to our newsletter.

تجزیے و تبصرے