پاکستان میں فنون لطیفہ کے فروغ اورکلچرکوبیرون ممالک تک پہنچانے والے ادارے رفیع پیرتھیٹر نے فلم انڈسٹری کی سپورٹ اوربحالی کے لیے جدید ٹیکنالوجی سے آراستہ انٹرنیشنل معیار کی تین فلمیں بنانے کا فیصلہ کرلیا۔
اس سلسلہ میں ایک فلم کی کہانی معروف رائٹرخلیل رحمان قمر اوردوسری عمران پیرزادہ لکھ رہے ہیں جب کہ تیسری فلم کی کہانی کے لیے جلد ہی رائٹرکا انتخاب ہوگا۔ فلم میں پاکستان کے علاوہ دوسرے ممالک کے فنکاربھی اداکاری کرینگے جب کہ فلم کی شوٹنگ کاآغازچارماہ بعدکیا جائے گا۔
اس سلسلہ میں سینئراداکارعثمان پیرزادہ نے ’’ ایکسپریس ‘‘ سے گفتگو کرتے ہوئے بتایا کہ رفیع پیرتھیٹرگروپ نے ہمیشہ ہی پاکستان کے خوبصورت کلچرکو پوری دنیا تک پہنچایا ہے۔ اس وقت پاکستان فلم انڈسٹری کوایسی بہت سی فلموں کی ضرورت ہے جو ہرلحاظ سے انٹرنیشنل مارکیٹ میں پاکستان کی نمایندہ بن سکیں۔
اسی لیے ہم نے تین فلمیں بنانے کا فیصلہ لیا ہے۔ فلم کی کاسٹ میں پاکستانی فنکاروں کے ساتھ ساتھ کچھ غیرملکی فنکاروں کے ساتھ بات چیت جاری ہے لیکن تاحال کچھ فائنل نہیں ہوسکا۔ مگرفلم کی کاسٹ اورشوٹنگ شیڈول کے بارے میں باقاعدہ پریس کانفرنس کے ذریعے سب کو آگاہ کیا جائے گا
