صحافیوں کے ایک وفد نے پنجاب اسمبلی میں صحافیوں کے حوالے سے متنازعہ بل کے حوالے سے اسپیکر پنجاب اسمبلی چوہدری پرویز الہی سے ملاقات کی ۔ چوہدری پرویز الہی نے کہا کہ پنجاب اسمبلی میں پیش کیے گئے بل سے صحافیوں کے خلاف تمام متنازعہ شقیں اتفاق رائے سے ختم کر دی گئیں ہیں ۔
ملاقات میں طے پایا کہ پنجاب اسمبلی کی کارروائی کے دوران سپیکر پنجاب اسمبلی اگر کوئی الفاظ کارروائی سے حذف کرنے کا کہیں گے تو پرنٹ و الیکٹرانک میڈیا اس کو شائع یا نشر نہ کرنے کا پابند ہو گا ۔
چودھری پرویزالٰہی نے کہا کہ "میں پاکستان میں آزادی صحافت اور صحافیوں کیلئے سب سے آگے میں ہوتا ہوں اور ہم آزادی صحافت پر مکمل یقین رکھتے ہیں، اس پر قد غن لگانے والوں کے میں خلاف خود کھڑا ہوں گا”
چودھری پرویزالٰہی نے کہا کہ کہ ” صحافی اور ارکان اسمبلی میرے لئے محترم اور قابل احترام ہیں۔ انہوں نے کہا کہ کوئی رکن اسمبلی ایوان سے باہر آکر میڈیا سے گفتگو کرے توصحافی اس سے ہر قسم کے سوال کر سکتے ہیں ۔ارکان اسمبلی کے حوالے سے سپیکر اسمبلی کے اختیارات برقرار رہیں گے ”
ملاقات کے دوران صحافیوں کے حوالے سے ایک ڈسپلنری کمیٹی بھی تشکیل دی گئی ہے جس کی سربراہی سپیکر پنجاب اسمبلی کریں گے ۔کمیٹی میں صحافیوں کے نمائندے بھی ہوں گے ۔
چوہدری پرویز الہی نے کہا کہ پنجاب اسمبلی کی نئی عمارت ابھی پنجاب اسمبلی کی نئی عمارت تکمیل کے مراحل میں ہے جس کے باعث مشکلات کا سامنا ہے ۔ عمارت کے مکمل ہوتے ہی سب کو اجازت دے دی جائے گی ۔
چودھری پرویزالٰہی سے ملاقات کے دوران رانا محمد عظیم ، شہزاد حسین بٹ ، آصف بٹ، مبشر بٹ، رانا عثمان، محمد شاہد چودھری، محمد فاروق جوہری، رانا مظہر شامل تھے ۔ رانا عظیم نے اس موقع پر چوہدری پرویز الہی کو مخاطب کرتے ہوئے کہا کہ صحافیوں کے لئے آپ کی خدمات بھلائی نہیں جا سکتیں ۔ شہزاد بٹ نے کہا کہ آج پنجاب بھر کے صحافی اپنے گھروں میں آپ کی بدولت بیٹھے ہیں ۔ انہوں نے کہا کہ پوری صحافی برادری چودھری پرویزالٰہی کی خدمات کی معترف ہے. انہوں نے کہا کہ یقین ہے کہ آپ آزادی صحافت میں ہمیشہ کی طرح ہم سے آگے کھڑے ہوں گے۔
