وسیم اکرم کا ریکارڈ اب عماد وسیم کے نام…

[pullquote]پاکستان نے آئرلینڈ کو پہلے ایک روزہ میچ میں 255 رنز کے بھاری مارجن سے شکست دے کر کئی انفرادی اور ٹیم ریکارڈز بنا دیے۔[/pullquote]

جمعرات کو ڈبلن میں کھیلے گئے دو ایک روزہ میچوں کی سیریز کے پہلے میچ میں شرجیل خان کے 152 رنز کی بدولت پاکستان نے مقررہ 47 اوورز میں 337 رنز کا مجموعہ اسکور بورڈ کی زینت بنایا اور جواب میں آئرش ٹیم 82 رنز پر ڈھیر ہو گئی۔ پاکستان نے میچ میں 255 رنز سے فتح حاصل کی جو ایک روزہ کرکٹ میں رنز کے اعتبار سے اس کی سب سے بڑی فتح ہے، اس سے قبل پاکستان نے 2000 میں بنگلہ دیش کو 233 رنز سے شکست دے کر یہ ریکارڈ بنایا تھا۔

یہ آئرلینڈ کی بھی ایک روزہ کرکٹ میں دوسری بڑی شکست ہے جہاں سب سے بڑی شکست کا سامنا انہیں نیوزی لینڈ کے ہاتھوں کرنا پڑا تھا جنہوں نے 2008 میں 290 رنز سے کامیابی حاصل کی تھی۔ یہ آئرلینڈ کا ایک روزہ کرکٹ میں پاکستان کے خلاف سب سے کم اسکور ہے، اس سے قبل 2011 میں پاکستان نے آئرلینڈ کو 96 رنز پر ٹھکانے لگا دیا تھا۔ میچ میں عماد وسیم نے 14 رنز کے عوض پانچ وکٹیں حاصل کر کے پاکستان کی جانب سے بہترین باؤلنگ کرنے والے بائیں ہاتھ کے باؤلر بننے کا اعزاز حاصل کر لیا۔

اس سے قبل یہ اعزاز وسیم اکرم کے پاس تھا جنہوں نے 15 رنز کے عوض پانچ کھلاڑیوں کو ٹھکانے لگایا تھا۔ 152 رنز بانے والے شرجیل خان نے 61 گیندوں پر سنچری مکمل کی جو پاکستان کی جانب سے بنائی گئی چوتھی تیز ترین سنچری ہے، اس سے قبل تینوں تیز ترین سنچریوں کا اعزاز شاہد آفریدی کے پاس ہے۔ شرجیل خان نے 85 گیندوں پر 150 رنز مکمل کیے، ایک روزہ کرکٹ میں صرف اے بی ڈی ویلیئرز اور شین واٹسن ہی ان سے زیادہ تیزی سے 150 رنز مکمل کر سکے ہیں۔ پاکستان اور آئرلینڈ کے درمیان سیریز کا دوسرا اور آخری ایک روزہ میچ ہفتہ کو کھیلا جائے گا۔

Facebook
Twitter
LinkedIn
Print
Email
WhatsApp

Never miss any important news. Subscribe to our newsletter.

مزید تحاریر

تجزیے و تبصرے