اسلام آباد: پاکستان میں تعینات افغان سفیر عمر زاخیل وال نے دھمکی دی ہے کہ اگر آئندہ چند دنوں میں پاک افغان سرحد نہ کھولی گئی تو وہ اپنی حکومت سے چارٹرڈ طیارہ بھیجنے کی درخواست کریں گے۔ افغان سفیر نے سماجی رابطوں کی ویب سائٹ پر جاری اپنے پیغام میں مزید کہا کہ ‘پاک افغان تجارتی و سفری راستوں کی مسلسل بندش سے عام افغان عوام کو نقصان ہورہا ہے’۔ انہوں نے مزید کہا کہ ‘میں نے پاکستان میں گزشتہ دو ہفتوں سے پھنسے ڈھائی ہزار کے قریب افغان شہریوں کی حالت زار کے حوالے سے پاکستانی حکام سے بات کی ہے’۔
عمر زاخیل وال کے مطابق زیادہ تر افغان شہری غریب لوگ ہیں جو پاکستانی ویزے پر علاج اور دوسرے کاموں سے پاکستان گئے اور اب وہ سرحد کی بندش سے وہاں پھنسے ہوئے ہیں۔ انہوں نے کہا کہ انہیں سرحد کو کھولنے کے حوالے سے کئی یقین دہانیاں کرائی گئیں تاہم اب تک عملی طور پر کچھ نہیں کیا گیا۔ عمر زاخیل وال نے کہا کہ انہوں نے اس حوالے سے پاکستانی وزیراعظم نواز شریف کے مشیر خارجہ سرتاج عزیز سے بھی بات کی اور انہیں یہ پیغام پہنچادیا کہ اگر آئندہ چند دنوں میں سرحد پر پھنسے افغان شہریوں کو واپس جانے کی اجازت نہیں دی جاتی تو وہ اپنی حکومت سے درخواست کریں گے کہ شہریوں کو ایئرلفٹ کرنے کے لیے چارٹرڈ طیارے فراہم کیے جائیں۔
انہوں نے کہا کہ اگر اس بات کی نوبت آئی تو یہ زیادہ بہتر صورتحال نہیں ہوگی۔ ان کا مزید کہنا تھا کہ سرحد کی بندش سے باہمی تجارت کو بھی نقصان پہنچ رہا ہے اور سرحد کی مسلسل بندش حال ہی میں ہونے والے اقتصادی تعاون تنظیم کے مقاصد کے بھی منافی ہے۔عمر زاخیل وال نے کہا کہ سرحد کی بندش کے بعد سے اب تک وہ پاکستان کی سول و عسکری قیادت سے اس بارے میں بات کرچکے ہیں لیکن انہیں اب تک اس کا قابل قبول جواز فراہم نہیں کیا گیا۔
انہوں نے کہا کہ پاکستان کی جانب سے موقف اپنایا گیا ہے کہ سرحد کی بندش کا مقصد دہشت گردوں کی نقل و حرکت کو روکنا ہے تاہم اس بات میں وزن نہیں کیوں کہ طورخم اور اسپین بولدک جیسے کراسنگ پوائنٹس پر سیکڑوں سیکیورٹی اہلکار تعینات ہیں اور وہاں سے گزرنے والوں کو چیک کرنے کے تمام ضروری آلات اور انفرااسٹرکچر موجود ہے۔ واضح رہے کہ افغان سفیر عمر زاخیل وال نے ہفتے کو بنی گالہ میں چیئرمین تحریک انصاف عمران خان سے بھی ملاقات کی تھی۔
ملاقات میں پاک افغان مذاکرات کی بحالی کی اہمیت و افادیت پر مکمل اتفاق کیا گیا تھا اور اس بات پر بھی اتفاق ہوا تھا کہ دونوں حکومتوں کو گفت و شنید سے معاملات سلجھاؤ کی جانب لے کر جانے چاہئیں. یاد رہے کہ فروری کے مہینے میں پاکستان میں ہونے والے دہشت گردی کے واقعات کے بعد پاک-افغان سرحد کو عام ٹریفک کے لیے کردیا گیا تھا۔ سرحد بند ہونے کے باعث بارڈر کے دونوں اطراف کاروباری اور افغانستان میں موجود غیر ملکی افواج کو سامان کی ترسیلات کرنے والے سیکڑوں ٹرک پھنسے ہوئے ہیں، اور انہیں حکومت کے اگلے احکامات تک جانے کی اجازت نہیں دی جائے گی۔ بارڈر حکام نے سرحد کے قریبی علاقوں میں دفعہ 144 نافذ کرتے ہوئےہر طرح کی نقل و حرکت پر پابندی عائد کردی ہے ، جب کہ افغانستان کی جانب سے پاکستان میں غیرقانونی داخل ہونے کی کوشش کرنے والے پر گولی چلانے کے احکامات جاری کیے گئے ہیں۔
[pullquote]’پاک افغان سرحد کی بندش سے انسانی بحران جنم لے رہا ہے’
[/pullquote]
اسلام آباد: پاکستان میں تعینات افغان سفیر عمر زاخیل وال نے چیئرمین پاکستان تحریک انصاف (پی ٹی آئی) عمران خان سے ملاقات کی جس میں پاک افغان تعلقات پر تفصیلی تبادلہ خیال کیا گیا۔ترجمان تحریک انصاف کے مطابق افغان سفیر نے چیئرمین تحریک انصاف سے بنی گالا میں ان کی رہائشگاہ پر ملاقات کی۔ملاقات کے دوران پاک افغان تعلقات پر تفصیلی بات چیت کی گئی جبکہ گھنٹہ بھر جاری رہنے والی ملاقات میں خطے کی مجموعی صورتحال پر تبادلہ خیال کیا گیا۔
ملاقات میں پاک افغان مذاکرات کی بحالی کی اہمیت و افادیت پر مکمل اتفاق کیا گیا اور اس بات پر بھی اتفاق ہوا کہ دونوں حکومتوں کو گفت و شنید سے معاملات سلجھاؤ کی جانب لے کر جانے چاہئیں۔ملاقات میں پاک افغان سرحد کی بندش سے پیدا ہونے والی صورتحال پر بھی گفتگو کی گئی۔اس موقع پر چیئرمین تحریک انصاف عمران خان کا کہنا تھا کہ پاک افغان سرحد کی بندش سے پاکستان میں پھنسے افغان شہریوں کی واپسی کیلئے اقدامات ضروری ہیں۔
انہوں نے یہ بھی کہا کہ سرحد کی دونوں طرف کھڑے ٹرکوں اور قیمتی سامانِ تجارت کی آمد و رفت کے حوالے سے فوری حکمت عملی بھی ناگزیر ہے۔علاوہ ازیں سماجی رابطوں کی ویب سائٹ ٹوئیٹر پر اپنے پیغام میں عمران خان نے کہا کہ ‘قانونی دستاویز کے حامل افراد کو سرحد پار کرنے کی اجازت دی جانی چاہیے’۔ان کا یہ بھی کہنا تھا کہ ‘پاک افغان سرحد کی بندش سے انسانی بحران جنم لے رہا ہے، دونوں ملکوں کے درمیان کراس بارڈر دہشت گردی کے معاملے پر موثر تعاون کی ضرورت ہے’۔
