ماڈل ایان کے کردار کی دھجیاں ہم نے صرف اس مفروضے پر اڑادیں کہ ایک اینکر مبشر لقمان نے کہا تھا کہ ایان آصف زرداری کی داشتہ ہے
ماڈل ایان نے کبھی خود کچھ نہیں کہا، آصف زرداری کی جانب سے بھی کوئی بات سامنے نہیں آئی، کسی آفیشل فورم پر یہ بات کبھی ڈسکس نہیں کی گئی مگر ایک اینکر کے بیان پر ہم نے وہ چسکے لیے کہ الامان الحفیظ
آج جب عائشہ گلالئی نے براہ راست عمران خان پر الزام لگایا، عدالت میں لے جانے کا چیلنج کیا تو ہمارے اندر کا وہ محمد بن قاسم بکل مار کر سوگیا جو بیٹیوں کے خاطر علاقے فتح کیا کرتا تھا
ہماری ترجیحات بالکل الگ ہیں، تنویر زمانی نے جب آصف زرداری کو اپنا شوہر کہا تو ہم تیر ترکش لے کر ایسے حملہ آور ہوئے کہ اسے دنیا کا سب سے بڑا عیاش قرار دے ڈالا اور جب عائشہ گلالئی کچھ کہہ رہی ہے تو ہمارا ماننا ہے کہ وہ کریکٹر لیس عورت ہے
مسئلہ عورت کے کریکٹر میں نہیں ہے ۔۔ سالا ہمارا کریکٹر ہی ڈھیلا ہے
ہم عائشہ گلالئی سے اس کے ساتھ ہوئی نازیبا حرکات کا ثبوت مانگ رہے ہیں، ہم نازیبا حرکت کے وقت کو انکشاف کے وقت سے جوڑ کر جھوٹ کے تناسب کا اندازہ لگارہے ہیں، ہمارے چہرے فق ہیں، سانسیں دھونکنی کی طرح چل رہی ہیں، ہماری حالت غیر ہے کہ کیسے اس عورت کو بدکردار ثابت کرکے عمران خان کو بچالیں
ہمارا ضمیر اسی وقت جاگا جب سعد رفیق کی پی ٹی وی اینکر ڈاکٹر شفق کے ساتھ جعلی اسکینڈل بنا، ہم نے زمین آسمان ایک کردیا، بلاول بھٹو کے ساتھ حناربانی کھر کا جعلی اسکینڈل بنا، ہم چسکیاں لیتے رہے، ابھی کچھ دن پہلے پی ٹی آئی کشمالہ طارق کو خواجہ آصف سے منسوب کرکے دھماچوکڑی کررہی تھی مگر اب عمران خان کے معاملے میں ہماری ترجیحات دوسری ہیں، ہمارے اندر کا معقول انسان بیدار ہوچکا ہے، ہمیں سازش نظر آرہی ہے، ہم ٹائمنگ دیکھ رہے ہیں
یاد رکھیں! عزت صرف دوسروں کی نہیں ہوتی کہ آپ جب چاہے اسے اچھال دیں، عزت آپ کی بھی ہے اور یہ کبھی بھی اچھالی جاسکتی ہے
2013 کے میسج کا 2017 میں عائشہ گلالئی نے نہیں بتایا بلکہ 2013 میں تو پہلا میسج آیا تو اور ہراساں کرنے کے عمومی کیسز میں اگر کوئی جاننے والا میسج کرے تو خواتین حتی الامکان تنازع سے بچنے کےلیے گریز کرتی ہیں، پانی سر سے گزرنے لگے تو مزاحمت کرتی ہیں، عائشہ گلالئی نے عدالت میں ثبوت دکھانے کا کہا ہے، آپ اور میں جج نہیں ہیں کہ اس سے ثبوت طلب کریں، اپنے جج کو اس سے پہلے خود ختم کرلیں کہ وہ آپ کو تباہ کردے
کل جب نازبلوچ نے تحریک انصاف چھوڑي تو اس کی عزت اچھال دی گئی مگر اس اللہ کی بندی نے عائشہ گلالئی کے معاملے میں عمران خان کو گندا نہیں کیا، وہ چاہتی تو اس کے پاس سنہری موقع تھا مگر اب وہ تحریک انصاف میں نہیں ہے جہاں عمران خان کا کردار ثابت کرنے کے لیے عائشہ گلالئی کی بہن کے نیکر پہننے پر اعتراض کیا جارہا ہے، وہ عمران خان جو خود پارلیمان نہیں جاتے، بتایا جارہا ہے کہ عائشہ گلالئی کو پارلیمان نہ جانے پر ڈانٹتے تھے
لاہور کی خدیجہ کو انصاف دلانے کی بات کرنے والے عمران خان کو پارسا ثابت کرنے کے لئے عائشہ گلالئی کے کردار کی دھجیاں نہیں اڑارہے بلکہ اپنی دھجیاں اپنے ہاتھوں سے خود اڑارہے ہیں
عائشہ گلالئی کی ایک نیوزکانفرنس پر آپ جتنا چاہے پردہ ڈال لیں، اس ایک لڑکی نے عمران خان کو جو سیاسی نقصان پہنچایا ہے، اس کے عشرعشیر کا بھی آپ کو اندازہ نہیں ہے اور یہ سزا عمران خان کو ملنا چاہیے تاکہ وہ عزت کی قدروقیمت کو سمجھ سکیں اور اگر یہ نہیں سمجھے تو مٹنے کے لیے تیار رہیں، مٹنے کا لفظ چھوٹا ہے، ان کو زندہ صرف ذلالت کے لیے رکھا جائے گا
حسین حقانی کے بلیک بیری کو چیک کرنے کا مطالبہ کرنے والے عمران خان سے ان کے بلیک بیری میسجز چیک کرنے کا مطالبہ ذاتی تو کہا جارہا ہے مگر وہ عمران خان ہی ہیں جنہوں نے طے کیا تھا کہ ثبوت کا بار ملزم کی گردن پر ہوتا ہے اور یہاں ملزم عمران خان ہیں
عمران خان اگر پارسا ہیں تو معاملہ عدالت لے جائیں، عائشہ گلالئی پر ہتک عزت کا مقدمہ دائر کردیں، دودھ کا دودھ اور پانی کا پانی ہوجائے گا، یہ نہیں ہوسکتا کہ آپ بیٹھ کر اس عورت کے کردار کی دھجیاں اڑائیں اور ہم صرف معقولیت کے لیے آپ کا ساتھ نبھاتے چلے جائیں
