گورنر ہاؤس پنجاب کو عوام کیلئے کھول دیا گیا، شہریوں کی بڑی تعداد پہنچ گئی.
لاہور: حکومت کی کفایت شعاری مہم کے تحت جہاں وزیراعظم و گورنر ہاؤسز کے اخراجات میں کمی لائی جارہی ہے وہیں انہیں عوام کے لیے بھی کھولنے کا سلسلہ جاری ہے۔
گورنر ہاؤس سندھ اور گورنر ہاؤس مری کے بعد آج گورنر ہاؤس پنجاب کو بھی عوام کے لیے کھول دیا گیا۔
مقررہ وقت سے پہلے ہی لوگوں کی بڑی تعداد گورنر ہاؤس کے باہر جمع ہونا شروع ہوئی جنہیں 10 بجتے ہی گورنر ہاؤس کے کشمیر روڈ کے گیٹ سے اندر جانے کی اجازت دی گئی۔
گورنر پنجاب چوہدری محمد سرور نے گورنر ہاؤس آنے والے افراد کی چند تصاویر بھی شیئر کیں اور کہا کہ تاریخ میں پہلی مرتبہ ہوا ہے کہ گورنر پنجاب نے عوام کے لیے گورنر ہاؤس کے دروازے کھولے۔
وزیر صنعت پنجاب میاں اسلم اقبال نے گورنر ہاؤس کی سیر کو آنے والوں کو خوش آمدید کہا اور کہا کہ وزیراعظم عمران خان کے وعدے کے مطابق گورنر ہاؤس عوام کے لیے کھول دیا ہے۔
انہوں نے کہا کہ گورنر ہاؤس کی سیر شہریوں کے لیے ایک خوشگوار احساس ہے، اسی طرح حکومت کے 100 روزہ ایجنڈے پر تیزی سے عمل درآمد جاری ہے۔
گورنر پنجاب چوہدری محمد سرور کے اعلان کے مطابق عوام اپنے اہل خانہ کے ہمراہ ہر اتوار صبح 10 بجے سے شام 6 بجے تک گورنر ہاؤس کی سیر کر سکیں گے، صوبائی وزرا اور اراکین اسمبلی گورنر ہاؤس آمد پر شہریوں کا استقبال کریں گے۔
گورنر پنجاب کے مطابق گورنر ہاؤس کا چڑیا گھر اور پارک بھی شہریوں کی اچھی تفریح کا باعث بنے گا۔
انتظامیہ کی جانب سے سیر کے لیےگورنر ہاؤس آنے والے اہلخانہ کے سربراہ کے پاس شناختی کارڈ لانا لازمی قرار دیا گیا ہے۔
انتظامیہ کی جانب سے ہدایت کی گئی ہے کہ شہری غیر متعلقہ چیزوں کو نہ چھوئیں، ڈیوٹی پر موجود اہلکاروں سے تعاون کریں اور گورنر ہاؤس کی املاک کو نقصان پہنچانے سے گریز کریں۔
واضح رہے کہ گزشتہ ہفتے سندھ کے گورنر ہاؤس کے پارک کو عوام کے لیے کھولا گیا تھا جس کے بعد شہری مقرر کردہ اوقات میں پارک کا دورہ کررہے ہیں۔
[pullquote]عوام کے ٹیکس سے چلنے والے ہاؤسز کو عوام کیلئے کھول رہے ہیں، گورنر پنجاب[/pullquote]
مری: گورنر پنجاب چوہدری سرور نے کشمیر پوائنٹ کے گورنر ہاؤس کو بھی آئندہ اتوار عوام کے لیے کھولنے کا اعلان کرتے ہوئے کہا کہ ان اقدامات کا مقصد عوام کو یہ احساس دلانا ہے کہ یہ عوام کی ملکیت ہے۔
گورنر ہاؤس مری میں پریس کانفرنس کرتے ہوئے چوہدری سرور نے کہا کہ لوگ کہتے ہیں یہ گورنر ہاؤس نہیں، یہ جو بھی ہے حکومت پنجاب کی ملکیت ہے، عوام کے ٹیکس کے پیسوں سے چلنے والے ہاؤسز کو عوام کے لیے کھول رہے ہیں۔
گورنر پنجاب نے کہا کہ پانی کا مسئلہ حل کرنا ہماری پہلی ترجیح ہے، گندا پانی پینے سے آنے والی نسل تباہ ہورہی ہے تاہم میں نے ذاتی حیثیت میں اپنی این جی او سے 100 سے زائد فلٹریشن پلانٹ لگائے۔
چوہدری محمد سروس کا کہنا تھا کہ پنجاب میں پینے کے پانی کی فراہمی کے لیے ان کی ذمہ لگائی گئی ہے، صوبے کے 26 ہزار دیہات میں صاف پانی پہنچانا ہے جو آسان نہیں۔
گورنر پنجاب نے کہا کہ صوبے کا پورا ترقیاتی بجٹ لگائیں تو پھر ہی تمام دیہات میں صاف پانی کی فراہمی ممکن ہے، پینے کے صاف پانی کے لیے بیرون ممالک دورہ کر کے لوگوں سے ڈونیشن لیں گے۔
ان کا کہنا تھا کہ مری میں یونیورسٹی اسپتال اور گیس کے مسئلے کو حل کرنے کا جامع پلان بنائیں گے اور ہم نے اختیارات نچلی سطح تک منتقل کرنے ہیں تاکہ مقامی مسائل مقامی عہدیدار حل کریں۔
