اسلام آباد: پاکستان نے عافیہ صدیقی کے حوالے سے تحفظات سے امریکا کو آگاہ کردیا۔
امریکی نائب وزیر خارجہ ایلس ویلز پاکستان کے دورے پر ہیں جہاں وہ سفارتی ملاقاتوں میں مصروف ہیں۔
ترجمان دفترخارجہ کے مطابق پاکستان نے عافیہ صدیقی کے حوالے سے تحفظات سے امریکا کو آگاہ کردیا ہے۔
سفارتی ذرائع کا کہنا ہے کہ پاکستان نے 6 نومبر کو ایلس ویلز کے دورہ پاکستان میں عافیہ صدیقی کا معاملہ اٹھایا، پاکستان کا مؤقف تھا کہ عافیہ صدیقی سے متعلق تمام تر بنیادی انسانی حقوق کو مدنظر رکھا جائے۔
ترجمان دفترخارجہ کا کہنا تھا کہ امریکی وفد کی جانب سے پاکستان کی درخواست پر غور کرنے کا وعدہ کیا گیا، پاکستان ڈاکٹر عافیہ صدیقی کا معاملہ امریکی حکام کے سامنے مسلسل اٹھاتا رہا ہے۔
ترجمان نے بتایا کہ پاکستان کے ہوسٹن میں قونصل جنرل ہر 15 روز بعد ڈاکٹر عافیہ سے ملتے ہیں اور وہ ڈاکٹر عافیہ کی خیریت دریافت کرکے ان تک فیملی کا پیغام پہنچاتے ہیں۔
سفارتی ذرائع کا یہ بھی کہنا تھا کہ دفترخارجہ نے وزیراعظم عمران خان کو عافیہ صدیقی کے خط سے متعلق آگاہ کیا ہے۔
دفتر خارجہ کے مطابق وزیرخارجہ شاہ محمود قریشی کا آئندہ ہفتے عافیہ صدیقی کی بہن ڈاکٹر فوزیہ صدیقی سے ملاقات کریں گے۔
یاد رہے کہ گزشتہ روز امریکا میں قید ڈاکٹر عافیہ صدیقی نے وزیر اعظم عمران خان کے نام خط لکھا تھا جس میں انہوں نے رہائی میں مدد کرنے کی اپیل کی تھی۔
