نوبل امن انعام دنیا کے معتبر ترین اعزازات میں شمار ہوتا ہے، لیکن اسے محض ایک انعام کہنا اس کی روح کی توہین ہو گی۔ یہ ایوارڈ ان افراد یا اداروں کو دیا جاتا ہے جو اپنے عمل، کردار اور قربانیوں کے ذریعے انسانیت کی فلاح کے لیے نمایاں خدمات انجام دیتے ہیں۔ اس اعزاز کی بنیاد 1901 میں رکھی گئی، جب الفریڈ نوبل کی وصیت کے تحت اس دنیا کو بہتر بنانے والوں کو باقاعدہ عالمی سطح پر سراہنے کا فیصلہ ہوا۔ امن کا نوبل انعام سیاسی، سماجی یا انسانی بحرانوں میں امید کی وہ کرن ہے، جو کسی بھی بحران زدہ قوم کے لیے روشنی کا ذریعہ بن سکتی ہے۔ اس کی حیثیت نہ صرف تعریفی یا تشہیری ہوتا ہے بلکہ یہ ایک ایسا اخلاقی معیار ہے، جو ظلم کے خلاف اٹھنے والی آواز کو تاریخ کا حصہ بنا دیتا ہے۔
اس اعزاز کی ایک اور خاص بات یہ ہے کہ یہ ان لوگوں کو عطا کیا جاتا ہے جنہوں نے طاقت کے مقابلے میں اصولوں کو ترجیح دی، جنہوں نے انتقام کی جگہ مفاہمت کو اپنایا، اور جنہوں نے ذاتی مفاد سے بالاتر ہو کر انسانیت کی بہتری کے لیے کام کیا۔ ایسے افراد کی کہانیاں صرف ملکوں کی تاریخ بدلتی ہے بلکہ دنیا بھر میں لاکھوں لوگوں کو بیدار کرتی ہیں۔ نوبل امن انعام محض نہ کسی ایک قوم یا خطے کا معاملہ ہوتا ہے، یہ عالمی انسانی ضمیر کی گونج ہے۔ یہ ہر اس شخص یا تحریک کی آواز بنتا ہے جو خاموشی سے، مگر مستقل مزاجی سے، ظلم، ناانصافی اور جبر کے خلاف سینہ سپر ہے۔
نوبل کمیٹی کا انتخاب محض رسمی فیصلہ نہیں ہوتا، یہ ایک ایسا اخلاقی پیغام ہوتا ہے جو پوری دنیا کو سنایا جاتا ہے۔ جب کسی شخصیت کو نوبل امن انعام دیا جاتا ہے، تو وہ خود بخود عالمی توجہ کا مرکز بن جاتی ہے۔ اس کا ہر لفظ، ہر قدم، اور ہر پیغام کئی ملکوں کے عوام کے لیے مشعلِ راہ بن سکتا ہے۔ یہی وجہ ہے کہ جب وینزویلا کی ماریا کورینا ماچاڈو کو یہ اعزاز دیا گیا، تو دنیا نے نا ہی صرف سیاسی رہنما کو، بلکہ ایک جذبے، ایک عزم، اور ایک قوم کی اجتماعی جدوجہد کو خراجِ تحسین پیش کیا۔
ماریا کورینا ماچاڈو کا نام سنتے ہی وینزویلا کے ان گلی کوچوں کی تصویر ذہن میں ابھرتی ہے جہاں عوام اپنے حقوق کے لیے سینہ سپر ہو کر کھڑے ہیں۔ وہ ایک ایسی سیاسی شخصیت ہیں جنہوں نے طاقتور آمریت کے خلاف استقامت کا مظاہرہ کرتے ہوئے نہ صرف اپنی جدوجہد کی راہ اپنائی انہوں نے بکھری ہوئی اپوزیشن کو ایک سمت دینے میں کلیدی کردار ادا کیا۔ نوبل امن انعام دینے والی ناروے کی کمیٹی کے مطابق، ماچاڈو نے وہ کر دکھایا جو بظاہر ناممکن دکھائی دیتا تھا: انہوں نے مختلف سیاسی دھاروں کو ایک اجتماعی نصب العین کے گرد اکٹھا کیا جمہوری اقدار کی بحالی اور شفاف انتخابات کی جدوجہد۔
یہ اعلان، جو اوسلو میں ایک سادہ مگر تاریخ ساز تقریب کے دوران کیا گیا، عالمی سطح پر ان تمام حلقوں کے لیے حوصلہ افزا پیغام بن کر ابھرا جو آمریت، جبر اور ناانصافی کے خلاف برسرپیکار ہیں۔ کمیٹی کے سربراہ یورگن واٹنے فرائڈنیس نے ماچاڈو کو ایک ایسی شخصیت قرار دیا جو سیاسی انتشار کے ماحول میں استقامت، اتحاد اور عوامی شعور کی علامت بن کر سامنے آئیں۔ وہ ایک ایسی رہنما ہیں جنہوں نے نااہلی، خطرات اور جبر کے باوجود اپنے وطن کے ساتھ رشتہ نہ توڑا، اور ان کی مسلسل سرگرمیوں نے لاکھوں وینزویلی شہریوں کو یہ یقین دلایا کہ تاریکی کتنی ہی گہری ہو، اجتماعی شعور اور مسلسل جدوجہد اس کا جواب ہو سکتی ہے۔
گزشتہ برس جب وینزویلا میں صدارتی انتخابات کی تیاریاں ہو رہی تھیں، ماچاڈو عوامی امنگوں کی سب سے روشن علامت تھیں۔ لیکن انہیں نااہل قرار دے کر انتخابی عمل سے باہر کر دیا گیا، تاکہ ان کی مقبولیت کو روکا جا سکے۔ ان کی جگہ ایڈمنڈو گونزالیس کو سامنے لایا گیا، جو اب جلاوطنی کی زندگی گزار رہے ہیں۔ یہ سب ایک ایسے سیاسی ماحول میں ہوا، جہاں ہر مخالف آواز کو دبانے کی منظم کوششیں جاری تھیں۔ حکومتی کریک ڈاؤن نے تمام حدیں پار کر لیں جبری گرفتاریاں، سیاسی نااہلیاں، اور مخالفین کی پرتشدد ہلاکتیں روزمرہ کا معمول بن گئیں۔ ایسے حالات میں ماچاڈو کی پرعزم شخصیت نے عوام کو ناامیدی کے سمندر میں ایک امید کا کنارا دیا۔ وہ مسلسل روپوشی کے باوجود اس جدوجہد کی علامت بنی رہیں، اور ان کا پیغام عوام کے دلوں تک مسلسل پہنچتا رہا۔
ماچاڈو کی قیادت صرف ایک سیاسی جدوجہد بلکہ ایک فکری تحریک کی صورت اختیار کر چکی ہے۔ ان کا نعرہ، ان کی روش، اور ان کا بے خوف اندازِ اظہار اب وینزویلا کی سرحدوں سے نکل کر عالمی ضمیر کا حصہ بن چکا ہے۔ ماچاڈو کی فداکاری لاکھوں ان افراد کی نمائندہ بن گئی ہے جنہوں نے ریاستی جبر کے سامنے سر اٹھانے کا حوصلہ دکھایا۔
دس دسمبر کو اوسلو میں ہونے والی تقریب میں انہیں یہ اعزاز باضابطہ طور پر دیا جائے گا۔ اپنے ابتدائی بیان میں ماچاڈو نے اس اعزاز کو وینزویلا کے عوام اور امریکی صدر ڈونلڈ ٹرمپ کے نام کیا۔ انہوں نے کہا کہ یہ ان تمام افراد کی کوششوں کا اعتراف ہے جو برسوں سے آزادی، عزت اور مساوات کی راہ میں قربانیاں دے رہے ہیں۔ انہوں نے صدر ٹرمپ کی سفارتی حمایت اور بین الاقوامی سطح پر وینزویلا کے حق میں آواز بلند کرنے کو خاص طور پر سراہا۔
ماچاڈو نے اس موقع پر کہا کہ آج وینزویلا کے عوام، لاطینی امریکا کے دیگر ممالک، امریکی شہری، اور جمہوریت نواز عالمی طاقتیں ان کی سب سے بڑی پشت پناہ بن چکی ہیں۔ ان کے بقول، نوبل امن انعام محض ایک تمغہ ہوتا ہے اور یہ اس بات کی دلیل بھی ہے کہ عالمی برادری ان کی جدوجہد کو تسلیم کر رہی ہے۔ یہ اعتماد وینزویلا کے لیے نئی توانائی، حوصلے اور ایک روشن افق کی نوید لایا ہے۔
انہوں نے ان بے شمار ایثاروں کو بھی یاد کیا جو عوام نے برداشت کیے ہیں، گرفتاریاں، جلاوطنی، تشدد، اور جان کے نذرانے۔ ماچاڈو نے کہا کہ ان سب کا حاصل یہ یقین ہے کہ جمہوری فتح اب دور نہیں۔ یہ انعام اس طویل مزاحمتی تحریک کا پہلا عالمی اعتراف ہے، جو برسوں سے خاموشی میں جاری تھی اور اب عالمی ضمیر اس کی گواہی دے رہا ہے۔
مزید برآں، اس سال نوبل امن انعام کے لیے 338 امیدواروں کے نام زیر غور تھے، جن میں سابق امریکی صدر ڈونلڈ ٹرمپ بھی شامل تھے۔ مگر بالآخر یہ اعزاز ماچاڈو کے حصے میں آیا ایک خاتون قائد، جنہوں نے اپنی شخصیت کو اجتماعی بیداری کا استعارہ بنا دیا۔ ان کے انتخاب نے وہ تمام قیاس آرائیاں ختم کر دیں جو دیگر امیدواروں کے گرد جاری تھیں۔
گزشتہ سال یہ انعام جاپان کی تنظیم نیہون ہیدانکیو کو دیا گیا تھا، جو جوہری ہتھیاروں کے خلاف شعور اجاگر کرنے میں مصروف ہے۔ اس تسلسل سے یہ بات واضح ہوتی ہے کہ نوبل کمیٹی اُن قوتوں کو ترجیح دیتی ہے جو خاموشی سے مگر تسلسل کے ساتھ انسانیت کی فلاح کے لیے سرگرم عمل ہیں۔ ماچاڈو کا انتخاب اسی فلسفے کی ایک نمایاں مثال ہے، یہ ثابت کرتا ہے کہ استقامت اور صداقت کے چراغ آمریت کی گہری تاریکی کو بھی چیر سکتے ہیں۔
یہ جاننا بھی ضروری ہے کہ نوبل امن انعام واحد نوبل اعزاز ہے جو سویڈن کے بجائے ناروے میں دیا جاتا ہے۔ اس کا اعلان اور تقسیم دونوں اوسلو میں ہوتے ہیں، جبکہ باقی انعامات اسٹاک ہوم میں دیے جاتے ہیں۔ یہ علیحدہ روایت الفریڈ نوبل کی وصیت کا حصہ ہے، جو اس انعام کو ایک غیر جانبدار ماحول میں دینے کی خواہش رکھتے تھے۔ یہی وجہ ہے کہ یہ انعام آج بھی دنیا بھر میں ایک منفرد حیثیت رکھتا ہے، اور جو اسے حاصل کرتا ہے، وہ عالمی ضمیر کا ترجمان بن جاتا ہے۔
ماچاڈو اب نہ وینزویلا ہی کی، دنیا بھر میں جمہوریت کے لیے برسرپیکار اقوام کی آواز بن چکی ہیں۔ ان کا سفر، ان کی جدوجہد، اور ان کی استقامت ان تمام اقوام کے لیے مثال ہے جو آمریت کے خلاف سینہ سپر ہیں۔ نوبل کمیٹی کے اس فیصلے نے یہ واضح کیا ہے کہ سچ کو دبایا جا سکتا ہے، مگر ختم نہیں کیا جا سکتا۔ اور جب سچائی نڈر آوازوں کے ذریعے گونجتی ہے، تو پوری دنیا اسے سننے پر مجبور ہو جاتی ہے۔
