اے نونہالانِ وطن، اے گلہائے چمن۔۔۔۔۔!! ربِ کعبہ کی قسم۔۔۔!!
مجھے تم سے ہمدردی ہے، مجھے تمہارے خون کی بوندیں اپنے جگر سے گرتی محسوس ہوتی ہیں۔۔۔۔۔۔۔ میں نے تمہاری خون سے رنگین نشستیں دیکھی ہیں، جہاں تم اپنا مستقبل سنوارنے کے سہانے خواب دیکھا کرتے تھے،۔۔۔۔میں نے تمہاری تڑپتی، سسکتی، بلکتی، دھاڑتی، چلاتی اور کلیجہ پھاڑ دینے والی آہ و زاری کرتی ماؤں بہنوں کو دیکھا ہے۔۔۔۔۔۔۔۔۔۔
میں نے تمہارے خون کے آنسو بہاتے، زخم خوردیدہ دل لیے بے تاب و بے چین باپ اور بھائی دیکھے ہیں۔۔۔۔۔۔۔۔ رب کونین کی قسم تمہارے خونِ ناحق کی داستانِ الم ناک سننے کی تاب شائد ہی کوئی ذی روح کرسکے۔۔۔۔۔۔۔۔۔ میں نے تمہارے جوان لاشوں کو لہو میں لت پت دیکھا ہے۔۔۔۔۔تمہاری معصوم کلیوں کی لاشوں کو روندا ہوا دیکھا ہے۔۔۔۔۔۔۔۔ اے مٹی سے پیدا ہونے والے پشاور کے مظلومو۔۔۔۔! میں بھی تمہارے جیسا بشر ہوں، دل و دماغ رکھتا ہوں، سینہ رکھتا ہوں، جگر رکھتا ہوں۔۔۔۔۔۔ایک انسان ہونے کے ناتے میں تمہارے کربناک مناظر دیکھ کر یقیناﹰ اوسان خطا کر بیٹھا تھا۔۔۔۔۔۔۔ ہاں تم سے مجھے وہی ہمدردی ہے، جو ہر ذی نفس کو ہے۔۔۔۔۔تمہاری مظلومیت پر انسان ہی نہیں درندے بھی رشک کھاجائیں۔۔۔۔۔۔۔۔ ہم تو پھر مٹی سے بنے انسان ہیں۔۔۔۔۔۔۔۔
لیکن اے طفلانِ بے ضرر۔۔۔۔۔اے تشنگانِ علم و ہنر۔۔۔۔۔۔۔۔ تمہارے لاشوں کے منظر کو سوچتے ہوئے میرا تصور کبھی باجوڑ کے پہاڑوں پر جاٹکراتا ہے۔۔۔۔۔ تمہارے پھول جیسے چہرے کے پیچھے کسی الجھے ہوئے بالوں اور فسردہ چہرے والے قبائلی بچے کی بے گور و کفن لاش کا منظر میرے دماغ کی سکرین پر گھومتا ہے۔۔۔۔۔۔۔۔ تمہارے خون سے رنگین درسگاہیں دیکھ کر مجھے باجوڑ ڈمہ ڈولہ کے مدرسے کی چٹائی پر قرآن پڑھنے والے معصوموں کی خاک نشینی بھی اپنی جانب متوجہ کرتی ہے۔۔۔۔۔۔۔۔
تمہارے بکھرے ہوئے بستے اور خون سے چھڑکی ہوئی فرش بوس کتابیں اور کاپیاں دیکھ کر سینہ چاک کرنے کا جی چاہتا ہے تو جامعہ حفصہؓ کی بچیوں اور لال مسجد کے بچوں کے خون سے رنگین قرآن و حدیث کی کتب کے اوراق کا تصور بھی انصاف کا متلاشی نظر آتا ہے۔۔۔۔۔۔
تمہارے تڑپتے سسکتے الٹے سیدھے رکھے ہوئے خون میں لت پت لاشے دیکھ کر وزیرستان کی کسی کھائی میں امریکی ڈرون سے ٹکڑے ٹکرے ہونے والے کسی پشتون کا دھڑ اور سر بکھرا ہوا نظر آتا ہے۔۔۔۔۔۔ تمہاری آہوں کو سن کر میرا تصور اٹھ سال قبل اسلام آباد کے قلب میں واقع جامعہ حفصہؓ کی چیختی چلاتی امت کی بیٹیوں کی جانب رخ کرتا ہے۔۔۔۔۔۔۔ تمہارے خون میں ڈوبے اجسام دیکھ کر مجھے فاسفورس بموں سے جلا کر راکھ کئے گئے لال مسجد کے بچے بھی یاد آتے ہیں۔۔۔۔۔۔۔۔۔ تمہاری بے سہارا پاکدامن ماؤں کے آنسو ٹی وی سکرین اور انٹرنیٹ پر دیکھ کر جہاں دل کٹ کر رہ جاتا ہے۔۔۔۔۔وہیں مجھے قبائلی بے سہارا ماؤں بہنوں اور نوجوان پاکیزہ امت کی بیٹیاں بھی سسکتی بلبلاتی نظر آتی ہیں، جنہیں دیکھنے کیلئے کوئی سکرین میسر نہیں۔۔۔۔۔جنہیں چلانے کی اجازت نہیں۔۔۔۔جنہیں اپنے ظلم پر آہ بھرنے کی اجازت نہیں۔۔۔۔۔۔۔ اے پشاور میں آگ میں کود جانے والی معلمہ ! اے بچوں کی خاطر آگ کو گلے لگانے والی عہد ساز پرنسپل صاحبہ ! خالق انس و جاں کی قسم ، مالک بحر و بر کی قسم۔۔۔۔۔۔۔ وارثِ خشک و تر کی قسم۔۔۔۔۔۔ مجھے آگ میں آپ کے جلتے لاشے کا تصور کرتے ہوئے دماغ پھٹتا، دل سیخوں میں جلتا محسوس ہوتا ہے، میں دانت پسیچ کر زور سے ہاتھ آنکھوں پہ رکھ کر سر کھپاتا ہوں۔۔۔۔۔۔۔۔۔ لیکن سر کھپاتے ساتھ ہی میرا ضمیر جھنجھوڑ کر مجھے جامعہ حفصہؓ میں گن شپ ہیلی کاپٹروں سے آگ نمرود میں غرق ہزاروں طیبہ، طاہرہ، عاتکہ، شاہدہ، عائشہ، خالدہ، نائلہ، میمونہ، ماہ رخ، صائمہ، بشریٰ، مریم، کلثوم، حاجرہ، حلیمہ ، کی مسخ شدہ اور ناقابلِ شناخت لاشوں پر اشک بہانے پر بھی مجبور کرتا ہے۔۔۔۔۔۔۔۔۔!!
اے میرے پشاور کے نونہالو ! اے معصوم شہیدو ۔۔۔!! اے باجوڑ، وزیرستان کے روندے ہوئے قبائلی شہید بچو۔۔۔۔!! اے سیدہ حفصہؓ کی پاکدامن، طیبہ و طاہرہ بیٹیو۔۔۔۔!! رب کونین کی قسم تم سب کا خون ایک جیسے خلیوں سے بنا تھا،تم سب اسی خاک سے پیدا کئے گئے تھے۔۔۔۔۔۔۔تم سب ایک جیسی کوکھ سے جنم لیے ہوئے تھے۔۔۔۔۔۔۔ تم سب کسی کے بھائی، کسی کی بہن، کسی کا بیٹا، کسی کی بیٹیاں تھیں۔۔۔۔۔۔۔۔ ہائےےے۔۔۔۔۔۔ زمین میں دھنسوں یا آسمان سر پہ گراؤں، ہائےےے میں دردِ دل کسے سناؤں۔۔۔۔۔ میں اپنا چاک گریباں کسے دکھاؤں۔۔۔۔۔۔۔ یہاں انسانیت کی تفریق بھی طبقات کی بنیاد کر ہے۔۔۔۔۔ یہاں ہمدردی بھی شخصی اصولوں پر ہے۔۔۔۔۔ یہاں دکھ کا اظہار بھی سند اور سرٹیفکیٹ کا طلبگار ہے۔۔۔۔۔۔۔۔۔ میں کس سے داستانِ الم بیاں کروں۔۔۔۔جو دل میں آگ ہے کیسے بجھاؤں۔۔۔۔۔۔۔۔۔۔ میں مجبور ہوں۔۔۔۔۔ میں لاچار ہوں۔۔۔۔۔ میں بے بس و بے کس ہوں۔۔۔
میں اس ناسور زدہ معاشرے کا ایک فرد ہوں، میں اس بکھرے اور اجڑے گلشن کا ایک تنکا ہوں۔۔۔۔۔۔۔جہاں میں تم پشاور کے ٹائی پینٹ والوں کا دکھ لکھوں تو طاغوت کا آلہ کار کہلاتا ہوں۔۔۔۔۔ امریکی غلام کہلاتا ہوں، اسلام کا غدار اور محبِ اغیار کہلاتا ہوں۔۔۔۔۔۔۔ اے لال مسجد ، جامعہ حفصہؓ ، باجوڑ ، وزیرستان اور خیبر کے بے گور وکفن قبائلیو ۔۔۔۔!! میں تمہارا درد لکھوں تو مجھے ملک دشمن، غدارِ وطن، خارجی، داعشی اور انسان کہلانے کے لائق نہیں سمجھا جاتا۔۔۔۔۔۔۔۔۔ !! میں اس ناسور زدہ معاشرے میں ہوں جہاں میزان مرضی کیمطابق ، پسند اور ناپسند کی بنیاد پر حق و باطل کو تولتا ہے۔۔۔۔۔۔ میرا تعلق اس سماج سے ہے جسے آج تک اپنے دشمن اور دوست کی پہچان نہیں ہوسکی۔۔۔۔۔۔ میں اس معاشرے کا ایک فرد ہوں جہاں پشاور کے انسانوں پر رونے والا لال مسجد کے لاشوں کو پتھر اور لکڑ سمجھتا ہے۔۔۔۔میں اس سماج سے ہوں جہاں غریب کے بچے پر رونا خروج کہلاتا ہے، اور پشاور پر آنسو بہانے والا مغربی ایجنٹ کہلاتا ہے۔۔۔۔۔۔میرا تعلق انسانی ہمدردی کے اس چیمپئن معاشرے سے ہے جہاں مسلک اور مکتب کی بنیاد پر انسانیت قائم ہے۔۔۔۔۔۔۔ اب میں اس صورتحال میں دو رستے اختیار کرسکتا ہو یا تو تصویر کا ایک رخ ایمان سمجھ کر قبول کرسکتا ہوں، یا پھر دوسری جانب پیٹھ کرکے پہلے والے سے بغاوت کرسکتا ہوں۔۔۔۔۔۔ !!
لیکن مجھے یہ زمانہ تصویر کے دونوں رخ دکھانے پر منافق کہتا ہے۔۔۔۔۔!! فی الوقت میں اسی منافقت پر عمل پیرا ہوں۔۔۔۔۔۔!!
