خواتین ٹینس ڈبلز کی عالمی رینکنگ میں حمکرانی کرنے والی ہندوستانی و سوئس جوڑی ثانیہ مرزا اور مارٹینا ہنگز نے اپنے اپنے راستے جدا کرنے کا فیصلہ کرلیا۔
ہندوستانی و سوئس کھلاڑیوں نے ایک بیان میں کہا کہ ہم نے ایک ساتھ تین گرینڈ سلیم اور 11 خواتین ٹینس ایسوسی ایشن ڈبلز ٹائلز جیتے لیکن اب ہم دونوں نے مشترکہ طور پر فیصلہ کیا ہے کہ ہم کسی دوسرے کھلاڑی کے ساتھ جوڑی بناکر بقیہ سیزن کے میچز میں ایکشن میں نظر آئیں گے۔
ثانیہ مرزا اور مارٹینا ہنگز نے کئی میچز میں ناکامیوں کی وجہ سے جوڑی کو ختم کرنے کا فیصلہ کیا۔ انہوں نے کہا کہ ہمارے گزشتہ شاندار ریکارڈ کی وجہ سے ہم نے اپنی پارٹنر شپ سے زیادہ توقعات وابستہ کرلی تھیں لیکن بدقسمتی سے ہمیں کئی میچز میں ناکامیوں کا سامنا کرنا پڑا اور ہم اپنی خواہشات کے مطابق نتائج حاصل نہ کرسکے۔
دونوں پلیئرز نے گزشتہ 16 ماہ سے خواتین ڈبلز ایونٹ کے میچز میں حصہ لیا اور تین گرینڈ سلیم ٹائٹلز ومبلڈن، یو ایس اور آسٹریلین اوپن سمیت مسلسل 41 میچز میں ناقابل شکست رہنے کا اعزاز حاصل کیا تاہم گزشتہ فروری میں قطر اوپن ٹینس میں ان کی فتوحات کو بریک لگ گیا۔
دونوں پلیئرز رواں سال روم ٹائٹل کی فاتح رہیں تاہم گزشتہ چار ایونٹس میں ان کا سفر کوارٹر فائنلز سے آگے نہ بڑھ سکا۔ واضح رہے کہ ثانیہ مرزا اور مارٹینا ہنگز گزشتہ سال انڈین ویلز اوپن کا فائنل جیت کر پہلی بار خواتین ڈبلز درجہ بندی میں پہلی پوزیشن پر پہنچ گئیں جس کے بعد اس جوڑی کو ’سنیٹا‘ کا خطاب دیا گیا تھا۔ البتہ دونوں پلیئرز رواں سال کے آخر اکتوبر میں سنگاہور میں ڈبلیو ٹی اے فائنلز میں اپنے اعزاز کے دفاع کے لیے ایک ساتھ نظر آئیں گی۔
