انتخابی نتائج نے ثابت کردیا کہ عوام احتجاجی سیاست سے تنگ ہیں،شہباز شریف

لاہور: وزیر اعلیٰ پنجاب شہباز شریف نے کہا ہے کہ این اے 120 کے ضمنی الیکشن کے نتیجے نے ثابت کردیا کہ عوام احتجاجی سیاست سے تنگ آچکے ہیں۔

میڈیا کے مطابق این اے 120 کے ضمنی انتخاب میں بیگم کلثوم نواز کی کامیابی پر شہباز شریف نے کہا کہ ضمنی الیکشن کے نتائج نے پھر ثابت کیا ہے کہ عوام خدمت کی سیاست کرنے والوں کے ساتھ ہیں، این اے 120 کے ضمنی الیکشن میں بیگم کلثوم نواز کی کامیابی عوام کا مسلم لیگ (ن)کی قیادت سے والہانہ محبت کا اظہار ہے۔

وزیر اعلیٰ پنجاب نے کہا کہ جھوٹ، الزام تراشی اور ذاتی مفادات کی سیاست کرنے والوں کو شکست کا سامنا کرنا پڑا ہے، ضمنی الیکشن کے نتائج نے ثابت کردیا ہے کہ عوام احتجاجی سیاست سے تنگ آچکے ہیں ، چار سال بعد بھی پاکستان مسلم لیگ (ن)ملک کی مقبول ترین جماعت ہے۔ مسلم لیگ(ن)نے ہمیشہ عوام کی بے لوث خدمت کی ہے، بیگم کلثوم کی جیت کے بعد مسلم لیگ(ن) عوامی خدمت کا سفر پہلے سے زیادہ عزم کے ساتھ جاری رکھے گی۔

واضح رہے کہ گزشتہ روز حلقہ این اے 120 کا ضمنی انتخاب سابق وزیراعظم نواز شریف کی اہلیہ کلثوم نواز نے جیت لیا ہے جب کہ تحریک انصاف کی ڈاکٹر یاسمین راشد 47066 ووٹ لے کر دوسرے نمبر پر رہیں۔