جماعت اسلامی پاکستان کے امیر سینیٹر سراج الحق نے کہا ہے کہ فوج یا جنرل راحیل شریف کی بڑھتی ہوئی مقبولیت سے جمہوریت کیلئے کوئی خطرہ نہیں۔ حکومت کو انتخابی اصلاحات لانا ہوں گی۔ آئین کے آرٹیکل 62 اور 63 پر عمل نہ کئے جانے سے متنازع لوگ پارلیمنٹ کا حصہ بن جاتے ہیں۔
ہفتے کو جماعت اسلامی کی مرکزی مجلس شورٰی کے اجلاس کے بعد پریس کانفرنس کرتے ہوئے سراج الحق نے کہا کہ لوہا گرم ہے ۔ وقت ضائع نہ کیا جائے ۔ کشمیر کی آزادی یقینی بنانے کے لیے موثر حکمت عملی اختیار کی جائے ۔ انتخابی نظام کی خرابی سے ملک میں جمہوریت اور الیکشن بس نام کو رہ گئے ہیں۔
انہوں نے کہاالیکشن کمیشن نے الیکشن ٹربیونل اورپارلیمنٹ کی اصلاحاتی کمیٹی کی طرف سے تجویز کردہ اصلاحات پر بھی عمل نہیں کیا۔ کراچی آپریشن مکمل کیا جائے اور پکڑے گئے افراد کو صفائی کا موقع ضرور دیا جانا چاہیے ۔ الطاف حسین کی پاکستان اور پاکستانی اداروں کے خلاف تقاریر سے ملک و قوم کے امیج کو شدید نقصان پہنچا۔
