ترکی کے دارالحکومت انقرہ میں امن ریلی کے شرکا پر دو بم حملوں میں 86 افراد ہلاک اور 186 زخمی ہوگئے۔ ترک صدر طیب اردوان نے واقعے کو ملک میں انتشار پھیلانے کی سازش قرار دے دیا۔
ترکی کا دارالحکومت انقرہ آج صبح دھماکوں سے گونج اٹھا، دھماکے انقرہ کے مرکزی ریلوے اسٹیشن کے قریبی علاقے میں ہوئے، جہاں بائیں بازو کے گروپوں کی جانب سے حکومت مخالف امن ریلی نکالنے کے لیے لوگ جمع ہورہے تھے۔
ریلی کرد باغیوں اور ترک سیکیورٹی فورسز کے درمیان پرتشدد جھڑپوں کی مذمت کے لیے نکالی جارہی تھی، دھماکے کے بعد ہر طرف ابتری اور افرتفری کے مناظر نظر آئے۔
ترک حکام کے مطابق دھماکے بظاہر خودکش معلوم ہوتے ہیں۔ ترک صدر طیب اردوان نے دھماکوں کی شدید مذمت کرتے ہوئے اسے ملک میں انتشار پھیلانے کی سازش قرار دیا ہے۔ دوسری طرف وزیراعظم احمد داؤد اوگلو نے صورتحال کا جائزہ لینے کے لیے ہنگامی سیکیورٹی اجلاس طلب کرلیا ہے