لاہور: سابق وزیر اعلیٰ پنجاب پرویز الہیٰ نے اپنے تمام ساتھیوں کے ساتھ پاکستان تحریک انصاف میں شمولیت کا اعلان کردیا۔
انہوں نے کہا کہ ہم عمران خان کے ساتھ ڈٹ کر کھڑے ہیں اور آئندہ بھی کھڑے رہیں گے، عمران خان کی قیادت پر مکمل اعتماد ہے اور ہم شکر گزار ہیں کہ انہوں نے ہمیں موقع بھی فراہم کیا۔
پرویز الہیٰ نے کہا کہ ہمارا اور ساتھیوں کا عمران خان کے ساتھ ہمیشہ رہے گا، ہم ہر وہ کام کریں گے جس سے ملک اور پنجاب کا فائدہ ہوگا، کبھی کوئی ایسا کام نہیں کریں گے جس سے ہماری پارٹی پی ٹی آئی کو نقصان پہنچے۔
ایک سوال کے جواب میں پرویز الہیٰ نے کہا کہ ’اگر کوئی سمجھتا ہے کہ اشارے کی وجہ سے پی ٹی آئی میں شمولیت اختیار کی تو یہ اچھی خبر ہے، میری کوشش ہے کہ سب کو ساتھ لے کر چلوں‘۔ انہوں نے مزید کہا کہ ’عمران خان نے مرکزی صدر کا عہدہ دینے کی بات کی ہے اُس پر جلد کام مکمل کرلیا جائے گا۔
پی ٹی آئی کے سینئر رہنما فواد چوہدری نے بتایا کہ پرویز الہیٰ کو پاکستان تحریک انصاف کا صدر بنایا جائے گا جس کی سینئر قیادت نے پارٹی آئین کے مطابق منظوری دے دی۔ انہوں نے کہا کہ ’پرویز الہی اور اُن کے ساتھی بشمول اراکین ہمیشہ عمران خان کے ساتھ سیسہ پلائی دیوار کی طرح کھڑے ہوئے ہیں، جس کی انہیں قیمت بھی ادا کرنا پڑی‘۔
فواد چوہدری نے پرویز الہیٰ اور اُن کے ساتھیوں کو پارٹی میں شمولیت پر خوش آمدید کہتے ہوئے کہا کہ ’ہم عمران خان کی قیادت میں اُس پاکستان کی طرف بڑھیں گے اور نیا پاکستان کا خواب پورا کر کے دکھائیں گے‘۔
پرویز الہٰی نے باقاعدہ طور پر پی ٹی آئی کو جوائن کر لیا ہے-@fawadchaudhry pic.twitter.com/aETTAIs5GT
— PTI (@PTIofficial) February 21, 2023
قبل ازیں پرویز الہیٰ کی زمان پارک میں ساتھیوں کے ساتھ عمران خان سے ملاقات ہوئی جس میں پی ٹی آئی کے جنرل سیکریٹری اسد عمر سمیت دیگر تحریک انصاف کے رہنما بھی شریک تھے۔ اجلاس میں مشترکہ سیاسی صف بندی کے حوالے سے حتمی بات چیت بھی ہوئی۔
ملاقات میں مسلم لیگ ق کے 10 سابق اراکین پنجاب اسمبلی اور سینئر رہنما بھی شریک ہوئے جبکہ سابق ارکان اسمبلی حافظ عمار یاسر، شجاعت نواز، عبداللہ یوسف وڑائچ، باؤ رضوان، ساجد بھٹی، احسان الحق، محمد افضل، باسمہ چوہدری اور خدیجہ عمر فاروقی بھی شریک ہوئے۔
علاوہ ازیں موسی الہی، چوہدری مقصود سلہریا، خرم منور منج اور حاجی عمر حبیب بھی ملاقات میں شامل تھے۔
[pullquote]چوہدری شجاعت نے پرویز الہیٰ کو پارٹی سے نکال دیا، رکنیت ختم[/pullquote]
لاہور / اسلام آباد: مسلم لیگ (ق) کے صدر چوہدری شجاعت حسین نے پرویز الہیٰ کی پارٹی رکنیت ختم کردی۔
چوہدری شجاعت حسین نے پرویز الہیٰ کی پارٹی آئین 2006 کے تحت بنیادی رکنیت ختم کی اور اعلان کیا کہ پرویز الہیٰ کو جتنے بھی عہدے دیے گئے انہیں کالعدم قرار دے دیا گیا ہے۔
چوہدری شجاعت نے کہا کہ پرویز الہیٰ آئندہ کسی بھی لحاظ سے خود کو مسلم لیگ ق سے منسلک نہ کریں کیونکہ اُن کے بیانات کی وجہ سے پارٹی کا تشخص اور ساکھ متاثر ہورہی ہے۔واضح رہے کہ چوہدری شجاعت حسین کی جانب سے پہلے بھی پرویز الہیٰ سمیت دیگر رہنماؤں کو اظہار وجوہ کا نوٹس ارسال کیا جاچکا ہے۔
