جونئیر ہاکی ایشیاکپ ٹورنامنٹ میں دوسری پوزیشن کے ساتھ سلور میڈل حاصل کرنے والی پاکستانی ٹیم کے کوچ و منیجر اولمپیئن حنیف خان نے کہا ہے کہ ہماری نگاہیں عالمی کپ پر مرکوز ہیں، اگر وسائل اور سہولیات میسر آئیں تو کھلاڑی قوم کو مایوس نہیں کریں گے۔
عمان کے شہر صلالہ میں منعقدہ جونیئر ایشیا کپ میں شرکت کے بعد وطن واپسی پر اظہار خیال کرتے ہوئے سابق قومی کپتان اولمپئن حنیف خان نے کہا کہ پاکستان کا سیمی فائنل تک رسائی کے بعد عالمی جونیئر کپ کیلئے کوالیفائی کرنا اہم کارنامہ ہے، اس سے ملک میں نہ صرف ہاکی کو دوام ملے گا بلکہ قومی کھیل کی ترقی کے لیے راہیں بھی کھل جائیں گی۔
حنیف خان نے کہا کہ محدود وقت میں کم وسائل کے ساتھ ہمارے کھلاڑیوں نے قومی جذبے کے ساتھ اچھی طرح تیاری کی اور بھرپور کارکردگی دکھائی، پاکستان کے پاس بہترین ٹیلنٹ موجود ہے، ٹورنامنٹ میں تمام کھلاڑیوں نے اچھے کھیل کا مظاہرہ کیا، خاص طور پر ٹاپ اسکور عبدالرحمن کی کارکردگی بہت عمدہ رہی۔
ابتدائی مقابلوں میں شاندار فتوحات سے کھلاڑیوں کا مورال بھی بلند ہوا جبکہ فائنل میں روایتی حریف بھارت سے مقابلے کے لیے ہمارے کھلاڑی بہت پرجوش اور پرعزم تھے، فائنل کے پہلے ہاف میں ہمارے کھلاڑی توقعات کے مطابق کھیل پیش نہیں کرسکے تاہم دوسرے ہاف میں بہتر انداز میں کھیل دکھایا لیکن تجربے میں کمی کی وجہ سے ہمارے کھلاڑی گول کرنے کے مواقع حاصل نہ کرسکے۔
دوسری جانب بھارتی ٹیم گزشتہ تین برسوں سے ہم آہنگ ہو کر کھیلنے میں مصروف تھی لیکن مجھے یہ کہنے میں کوئی عار نہیں کہ ہمارے کھلاڑیوں نے وسائل نہ ہونے کے باوجود عمدہ کھیل پیش کیا۔
حنیف خان نے کہا کہ اب ہماری تمام تر توجہ ملائیشیا کے شہر کوالالمپور میں رواں سال 5 سے 16 دسمبر تک ہونے والے عالمی جونیئر کپ پر ہے، کوشش کریں گے کہ کھلاڑیوں کو بہتر سے بہتر سہولیات فراہم کی جائیں اور دوران تربیت کھلاڑیوں کی خامیوں کو دور کرکے ان کی صلاحیتوں میں نکھار لایا جائے۔
