بڑے عرصے بعد ایک محفل میں پاکستان فلم انڈسٹری کے تمام بڑے نام ایک ساتھ جمع ہوئے اور پاکستان فلم گلڈ کے ممکنہ قیام اور اس کی اہمیت کے بارے میں اپنے خیالات کا اظہار کیا۔
اس فلم گلڈ کا مقصد فلمی صنعت سے تعلق رکھنے والے افراد کو ایک ایسا پلیٹ فارم مہیا کرنا ہے جہاں ان کی کاوشوں کو سراہا جاسکے اور ان کے حقوق کی ضمانت دی جاسکے۔
تقریب کا انعقاد سنی پیکس سینما کے سی ای او ہاشم رضا اور ایورریڈی گروپ آف کمپنیز کے ستیش آنند کی جانب سے کیا گیا تھا۔
اس موقع پر سنی پیک سینما کے سی ای او ہاشم رضا نے فلم گلڈ کے قیام کی ضرورت پر زور ڈالتے ہوئےکہا کہ اس ادارے کا مقصد فلم انڈسٹری سے تعلق رکھنے والے افراد کے حقوق کی ضمانت دینا اور ان کے لیے ایسی سرگرمیوں کا انعقاد کرنا ہے جن کے ذریعے ان کو کام میں رہنمائی کے ساتھ ساتھ سکالرشپ، میڈیکل کی سہولیات، اور قانونی مدد بھی فراہم کی جاسکے۔
ایورریڈی گروپ کے چیئر مین ستیش آنند کا کہنا تھا کہ فلم گلڈ کے قیام کا مقصد فلموں کےجملہ حقوق کی ضمانت، سکرپٹ رجٹریشن، نئی صلاحیتوں کی تلاش اور فلم انڈسٹری کو مستقل خطوط پر استوار کرنا ہے۔
ہم فلمز کی صدر سلطانہ صدیقی کا کہنا تھا کہ ہم جب بھی اپنے ڈراموں یا فلموں کی شوٹنگ کے لے بیرون ملک اپنے میک اپ آرٹسٹ یا دیگر ٹیلنٹ لے کر جانا چاہتے ہیں تو ان کی انڈسٹری گلڈ کی جانب سے صاف صاف کہ دیا جاتا ہے کہ ان کے قوانین کے تحت ہم کو ان کے مقامی ٹیلنٹ سے ہی کام کروانا ہوگا۔ اس ہی طرح ہمیں بھی پاکستانی ٹیلنٹ کی پروموشن کے لیے ایک ایسے ہی پلیٹ فارم کی ضرورت ہے۔
تقریب کی پبلک ریلیشننگ کے فرائض سٹارلنکس اینڈ پی آر نے ادا کیے تھے۔
