ابو کو گولی مار دیتے ہیں!

فورتھ شیڈول کو ایک ماہ گزر گیا۔۔۔ گھر میں موجود رقم ختم ہو گئی اور مقبول چیک لے کر بینک گیا۔
۔ یہ چیک کیش نہیں ہو سکتا۔
۔ کیوں؟
۔ شناختی کارڈ بند ہو گیا ہے۔۔۔۔
۔ امی چیک کیش نہیں ہو رہا۔
۔ چلو یہ موٹر سائیکل بیچ دو۔ گھر تو چلانا ہے۔
۔ ڈیلر: یہ موٹر سائیکل نہیں بک سکتی؟
۔ کیوں؟
۔ مالک کا شناختی کارڈ جعلی ہے۔
۔ امی، ڈیلر کہہ رہا ہے شناختی کارڈ جعلی ہے۔
۔ اچھا یہ موبائل لے جاؤ۔ یہ تو بک جائے گا نا۔
۔ دوکاندار: نہیں بابا۔ لگتا ہے یہ چوری کا مال ہے۔ مالک کا شناختی کارڈ نمبر ہی ٹریس نہیں ہو رہا۔
۔ امی، موبائل چوری کا ہے۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(مقبول کالج میں)
۔ جی بیٹا اپنے کاغذات دیجئے۔
۔ یہ لیجئے سر!
۔ شناختی کارڈ؟
۔ میرا نہیں بنا۔ ابو کا ہے۔۔
۔ لائیے۔
۔ معذرت بیٹا! یہ کارڈ بند ہو چکا ہے۔ نیا کارڈ لائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(مقبول باپ کے مقروض کے پاس)
۔ انکل، ابو گاڑی کی باقی رقم مانگ رہے تھے۔ وقت سے دو ماہ اوپر ہو گئے ہیں۔
۔ کاہے کے پیسے؟ میں نے کوئی قرض نہیں دینا تمہارے ابا کا۔۔۔
۔ امی، وہ کہہ رہا ہے کہ میں نے کوئی قرض نہیں دینا تمہارے ابا کا۔۔۔
۔ میں جاتی ہوں وکیل کے پاس اشٹام لے کر۔ کیسے نہیں دیتا دیکھوں گی۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔ جج صاحب میرے موکل کے خلاف دعویٰ جھوٹا ہے کیونکہ اشٹام پر جس شخص کا نام لکھا ہے، اس کا شناختی کارڈ جعلی ہے۔ حکومت پاکستان نے جاری ہی نہیں کیا۔ اس لئے جب تک اس شخص کو عدالت شناخت نہ کرے اس بارے میں کوئی فیصلہ نہیں ہو سکتا۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔ کیا ہوا امی؟
۔ شناختی کارڈ جعلی ہے؟
۔ میں نے پہلے ہی کہا تھا کہ کارڈ جعلی ہے، مگر آپ مان ہی نہیں رہیں تھیں!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔ اف میرے مولا کس عذاب میں گرفتار ہو گئے ہیں! اس کا حل کیا ہوگا؟ میں رہی خاتون خانہ اور تم نا بالغ۔۔۔۔۔ میں کسی سے کیا لین دین کروں گی اور تم پر کون اعتبار کرے گا؟؟؟؟؟
۔ امی میرے پاس اس کا ایک حل ہے۔۔
۔ جلدی بتا میرا بیٹا!
۔ ابو کو گولی مار دیتے ہیں۔۔۔۔
۔ ملعون کیا بکواس کر رہا ہے؟؟؟؟
۔ سچ کہہ رہا ہوں امی! اس طرح ہم دوںوں آزاد ہو جائیں گے۔ آپ بیوہ ہو جائیں گی اور کسی جگہ شوہر کے نام کی ضرورت نہ رہے گی اور میں یتیم ہو جاؤں گا اور کسی جگہ باپ کا نام لکھنے کی ضرورت نہیں پڑے گی ۔۔۔۔۔۔۔۔

Facebook
Twitter
LinkedIn
Print
Email
WhatsApp

Never miss any important news. Subscribe to our newsletter.

مزید تحاریر

تجزیے و تبصرے