وزیراعظم عمران خان سے پاکستان کے دورے پر آئے ایرانی وزیرخارجہ جواد ظریف نے ملاقات کی ہے۔
وزیراعظم کے دفتر میں ہونے والی ملاقات میں پاک ایران تعلقات اور دو طرفہ تعاون پر تبادلہ خیال کیا گیا۔
اس موقع پر وزیراعظم عمران خان کا کہنا تھا کہ پاکستان اور ایران کے درمیان قریبی اور خوشگوار تعلقات ہیں، دونوں ملکوں کو باہمی مفاد میں دو طرفہ تعاون کو مزید مضبوط کرنا ہوگا۔
اعلامیے کے مطابق وزیر اعظم عمران خان نے جواد ظریف کی پاکستان آمد کا خیرمقدم کیا اور کورونا کے باعث ایران میں قیمتی جانوں کے ضیاع پر اظہار تعزیت کیا۔
وزیراعظم کا کہنا تھا کہ اسمارٹ لاک ڈاؤن اور دیگر اقدامات سے پاکستان میں وبا کا پھیلاؤ روکا گیا۔
اعلامیے کے مطابق وزیر اعظم نے دوطرفہ تجارت، اقتصادی تعلقات بڑھانے، امن و سلامتی اور ترقی کیلئے مل کر کام کرنے کی ضرورت پر زور دیا۔
اعلامیے میں کہا گیا ہے کہ وزیراعظم نے افغانستان میں قیام امن اور استحکام کیلئے پاکستان کی کوششوں پر روشنی ڈالی اور کہا کہ افغان تنازع کا کوئی فوجی حل نہیں ہے۔
اعلامیے کے مطابق وزیر اعظم نے افغانوں کی زیر قیادت امن عمل کیلئے حمایت کا اعادہ کیا۔
خیال رہے کہ ایرانی وزیر خارجہ دو روزہ دورے پر پاکستان میں موجود ہیں جہاں انہوں نے اعلیٰ سیاسی و عسکری قیادت سے ملاقات کی ہے۔
