حکومت مخالف اپوزیشن اتحاد پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے وزیراعظم کو شدید تنقید کا نشانہ بناتے ہوئے کہا ہے کہ ’جب دو اور دو چار نہيں سمجھتے تو حکومت لی کیوں تھی‘۔
مردان میں پی ڈی ایم کے جلسے سے مولانا فضل الرحمان نے خطاب کرتے ہوئے وزیراعظم عمران خان کے گزشتہ روز دیے گئے بیان پر خوب تنقید کی۔
وزیراعظم عمران خان نے گزشتہ روز اپنے خطاب میں کہا تھا کہ کسی بھی نئی حکومت کو تیاری سے پہلے اقتدار میں نہیں آنا چاہیے، تین ماہ تو ہمیں گورننس سمجھنے میں لگ گئے، ڈیڑھ سال تک تو صحیح اعداد و شمار ہی پتا نہیں چل سکے, بجلی کے بارے میں سوچ کر رات کو نیند نہیں آتی۔
اپنے خطاب میں مولانا فضل الرحمان نے کہا کہ ’ہم تو شروع سے کہتے تھے یہ نااہل ہیں، عوام کا یہ سمندر اسلام آباد سے گند صاف کرے گا، پوری قوم کرب میں ہے کہ ایک ناجائز اور ظالمانہ تسلط کا سامنا ہے، ان جابروں اور آمروں کے خلاف اللہ کی نصرت عوام کے ساتھ ہے‘۔
مولانا فضل الرحمٰن نے کہا کہ ’ہم تو کہتے ہی تھے کہ یہ نااہل حکومت ہے اب تو اس نے خود اعتراف کرلیا، اب کہتے ہیں کہ میرے پاس کام کے بندے نہیں ، کہتے تھے کہ نوکریاں دوں گا ، ملک میں شہد اور دودھ کی نہریں بہیں گی، اب کہتے ہیں کہ مجھے سمجھ ہی نہیں آئی‘۔
انہوں نے کہا کہ جب حساب کتاب کا علم نہیں تو کس نے کہا تھا کہ حکومت میں آؤ، حکومت نے ملک کی معیشت تباہ کردی ، آج غریب آدمی کی قوت خرید جواب دے چکی ہے، اس نااہل حکومت کو پاکستان پر حکومت کرنے کا کوئی حق حاصل نہیں۔
سربراہ پی ڈی ایم نے کہا کہ ’معیشت تباہ کردی اور ہمیں انڈے اور کٹے دکھا رہے ہیں کہ اس سے معیشت ٹھیک ہوگی، انڈے بھی 240 روپے درجن پر پہنچ گئے ہیں‘۔
مولانا فضل الرحمٰن نے کہا کہ سپریم کورٹ کہتی ہے نیب منظم انداز سے سیاستدانوں کے خلاف کارروائی کرتا ہے، نیب اسٹیبلشمنٹ کی کٹھ پتلی ہے جبکہ عمران خان کہتے ہیں کہ مجھےحساب دینا ہوگا میں کہتا ہوں کہ ابھی تو تم میرے احتساب کے شکنجے میں ہو، ہم تمہیں کہاں پہنچائیں گے تمہیں اندازہ ہی نہیں ہے۔
انہوں نے مزید کہا کہ جو تمہاری رکھوالی کرتے ہیں وہ ہمیں کہتے ہیں کہ ہمیں کچھ نہ کہو تم جانو اور عمران خان جانے، پاکستان خطے میں تنہا ہوگیا، چین ہم سے ناراض اور سعودی عرب ہم سے ناراض، جب سعودی عرب نے پیسے واپس مانگے تو چین سے کہا کہ پیسے تو دے دو، جتنے دن یہ حکومت رہے گی ملک ڈوبتا چلا جائے گا۔
