سان ڈیاگو: ایک نئی تحقیق میں بتایا گیا ہے کہ خواتین کے چہرے پر موجود بیکٹیریا کے سبب جھریوں کی کیفیت بدتر شکل اختیار کر سکتی ہے۔
الٹرا وائلٹ روشنی اور عمر بڑھنے کا عمل اب تک جِلد میں لچک کے خاتمے کے اہم عوامل سمجھے جاتے تھے لیکن اب ایک تحقیق میں محققین کا خیال ہے اس صورت میں بیکٹیریا کا بھی ایک اہم کردار ہوسکتا ہے۔
یونیورسٹی آف کیلیفورنیا سان ڈیاگو نے کاسمیٹکس کی ایک نجی کمپنی کے ساتھ تحقیق میں 13 مطالعوں کا جائزہ لیا۔ مطالعوں میں 18 سے 70 سال کے درمیان 650 خواتین کی جِلد کی کیفیت کا معائنہ کیا گیا۔
ہر تحقیق میں ایک مخصوص چیز کا جائزہ لیا گیا جس میں کروز فیٹ (آنکھوں کے اطراف پڑنے والی جھریاں)، جھریاں یا نمی میں کمی شامل تھیں۔ لیکن اس نئی تحقیق میں تمام مطالعوں کو یہ جاننے کے لیے دیکھا گیا کہ آیا ہمارے چہروں پر موجود مختلف اقسام کے بیکٹیریا کا اس سے کوئی تعلق ہے یا نہیں۔
محققین کا کہنا تھا کہ تحقیق کے مطابق وہ افراد جن کے چہرے پر مختلف اقسام کے بیکٹیریا تھے ان کی جلد پر زیادہ کروز فیٹ (جس کو عموماً جِلد کے بوڑھا ہونے کے اہم اشارے کے طور پر دیکھا جاتا ہے) تھے۔
تاہم، مختلف اقسام کے بیکٹیریا کے ہونے کا ایک مثبت اثر بھی تھا اور وہ یہ کہ اس طرح بیکٹیریا کے نیچے موجود جلد سے نمی نہیں جاتی اور نمی کا ختم ہوجانا جِلد کو ناتواں ظاہر کرتا ہے۔
