وزیر اعلیٰ پنجاب کی معاون خصوصی برائے اطلاعات فردوس عاشق اعوان کا گھوٹکی ٹرین حادثے پر بیان تنقید کی زد میں آگیا۔
معاون خصوصی فردوس عاشق اعوان نے تنقید کے بعد ٹوئٹ کرکے وضاحت کی کہ رواں برس خوفناک ٹرین حادثات میں نمایاں کمی آئی ہے اور گزشتہ 15 ماہ میں یہ پہلا بڑا ٹرین حادثہ ہے۔
گذشتہ کئی سالوں میں پے در پے پیش آنے والے ٹرین حادثات کی نسبت رواں برس اس نوعیت کے خوفناک حادثات میں نمایاں کمی آئی ہے۔ گذشتہ 15ماہ میں یہ پہلا بڑا ٹرین حادثہ ہے۔ اس تناظر میں دئیے گئے میرے ایک بیان کو سیاق و سباق سے ہٹ کر توڑ موڑ کر پیش کیا جارہا ہے۔
— Dr. Firdous Ashiq Awan (@Dr_FirdousPTI) June 7, 2021
انہوں نے کہا کہ ٹرین حادثے پر ان کے بیان کو توڑ مروڑکرپیش کیاجارہا ہے۔
خیال رہے کہ گزشتہ روز فردوس عاشق اعوان نے ٹرین حادثے پر دیے گئے بیان میں کہا تھا کہ ’اللہ کے فضل و کرم سے یہ اس سال پہلا حادثہ ہے، قوم کو یاد ہے جب ہر دوسرے دن یہی ریل ٹریک کسی حادثے کا شکار ہوتا تھا‘۔
