لبرٹی چوک کے جلسے کے شرکا سے خطاب میں عمران خان کا کہنا تھاکہ جب تک شفاف الیکشن نہیں ہوں گے خوف ہے کہ ملک ڈوب جائے گا۔
50 سال میں آج سب سے زیادہ مہنگائی ہے، 30 سال سے جوملک کو لوٹ رہے تھے ان کو اوپربٹھا دیا گیا، جس ملک کا یہ دیوالیہ نکال گئے تھے اس کو ہم نے 2018 میں سنبھالا، چوروں کا ٹولہ ملک کو تباہی کی طرف لے کرجارہا ہے، ہمارے پاس ڈالر نہیں آرہے تھے پھر بھی ہم نے معیشت کو اٹھایا۔
عمران خان نے مزید کہا کہ ان کو پاکستان کی کوئی فکر نہیں ان کے پیسے باہر پڑے ہوئے ہیں، ان پر جب کوئی مشکل آتی ہے یہ باہر بھاگ جاتے ہیں۔
عمران خان نے ایک بار پھر الزام عائد کیا کہ حکومت گرانے کا ایک شخص ذمہ دار ہے وہ جنرل (ر) قمر جاوید باجوہ ہے، وہ آرمی چیف تھے اس لیے ان کے خلاف بات نہیں کرتا تھا۔ ہماری کوشش ہے فوج مضبوط ہو لیکن اُس وقت کے آرمی چیف جنرل باجوہ نے ہمیں ہٹانے کا فیصلہ کیا۔
