امریکی شہر ہیوسٹن میں گاڑیوں پر اندھا دھند فائرنگ کرنے والے مسلح شخص کو پولیس نے موقع پر پہنچ کر گولی مار دی۔
امریکی میڈیا کے مطابق مسلح شخص کی فائرنگ سے ماں اور بیٹی سمیت 3 افراد زخمی ہوئے جنہیں اسپتال منتقل کر دیا گیا ہے۔
پولیس کے مطابق واقعے سے متعلق صبح 11 بجے اطلاع ملی جس کے بعد موقع پر پہنچنے والے اہلکاروں نے مسلح شخص کو ہتھیار پھینکنے کی وارننگ دی۔
امریکی میڈیا کے مطابق موقع پر موجود پولیس اہلکاروں نے مسلح شخص کو ایک سے زائد گولیاں ماریں جس کے بعد اسے زخمی حالت میں اسپتال منتقل کر دیا گیا، واقعے میں کوئی پولیس اہلکار زخمی نہیں ہوا۔
ملزم کی حالت یا شناخت سے متعلق ابتدائی طور پر کوئی تفصیل جاری نہیں کی گئی ہے۔
امریکی میڈیا کے مطابق ایک عینی شاہد نے واقعے سے متعلق بتایا کہ مسلح شخص سڑک کے درمیان بنے حصے پر کھڑا تھا اور وہ بس روڈ پر آنے والی گاڑیوں پر فائرنگ کر رہا تھا۔
عینی شاہد کا کہنا ہے کہ ملزم کو کوئی پرواہ نہیں تھی کہ وہ کس گاڑی پر فائرنگ کر رہا ہے اور گاڑیوں میں بچے بھی موجود ہیں۔
پولیس کے مطابق ایک گاڑی میں سوار ماں اور اس کی بیٹی جبکہ دوسری گاڑی میں سفر کرنے والے ایک تیسرے شخص کو بھی گولی لگی۔
پولیس کی واقعے سے متعلق تفتیش جاری ہے۔
