بلوچستان میں کورونا مریضوں کے علاج کیلئے پلازمہ تھراپی کا آغاز

بلوچستان کے دارالحکومت کوئٹہ میں کورونا وائرس کے مریضوں کا علاج کورونا سے صحتیاب افراد کے پلازمہ سے شروع کر دیا گیا۔

ڈائریکٹر ہیلتھ سروسز بلوچستان ڈاکٹر سلیم ابڑو نے بتایا کہ بلوچستان میں کورونا وائرس کے علاج کے لیے غیر معمولی پیش رفت ہوگئی اور کورونا وائرس سے صحت مند ہونے والے افراد کے پلازمہ کے ذریعے کوئٹہ میں بھی مریضوں کا علاج شروع کردیا گیا ہے۔

انہوں نے بتایا کہ علاج کے لیے ابتدائی طور پر دو مریضوں کو پلازمہ لگایا گیا، دونوں مریضوں میں مثبت پیشرفت دیکھنے میں آرہی ہے۔
ڈی جی ہیلتھ بلوچستان ڈاکٹر محمد سلیم ابڑو نے مزید بتایا کہ پلازمہ کے ذریعے علاج کے لیے طبی ماہرین کی ٹیم کوئٹہ کے مقامی ڈاکٹرز کو بھی تربیت دے گی، جس کے بعد اس طریقہ علاج کو صوبے بھر میں وسعت دی جائے گی۔

ڈاکٹر محمد سلیم ابڑو نے بتایا کہ پلازمہ کی کولیکشن ریجنل بلڈ سینٹر میں ہوگی، طبی پروسیجر مکمل کر کے شیخ زید اسپتال، فاطمہ جناح چیسٹ اسپتال و دیگر مخصوص اسپتالوں میں مریضوں کا علاج کیا جائے گا۔

ان کا کہنا تھا کہ محکمہ صحت بلوچستان کورونا وائرس کے علاج میں خاصی پیش رفت حاصل کر رہا ہے، جلد مزید اچھی خوشخبری ملے گی۔

واضح رہے کہ ملک میں کورونا کیسز کی تعداد روز بروز بڑھتی جارہی ہے، اب تک مجموعی تعداد 71 ہزار 101 ہے جس میں سے 4 ہزار 393 کا تعلق بلوچستان سے ہے جب کہ صوبے میں اب تک 47 مریض بھی انتقال کر چکے ہیں۔

Facebook
Twitter
LinkedIn
Print
Email
WhatsApp

Never miss any important news. Subscribe to our newsletter.

تجزیے و تبصرے