کراچی: گزشتہ 24 گھنٹوں میں سندھ بھر میں کورونا کے 209 مزید نئے کیسز رپورٹ ہوئے اور 2 افراد انتقال کرگئے۔
وزیراعلیٰ سندھ مراد علی شاہ کے مطابق گزشتہ روز سندھ میں 2372 ٹیسٹ کیے گئے جن میں 209 مثبت آئے ہیں، اس طرح صوبے میں کورونا کے مریضوں کی تعداد2217 ہوگئی جب کہ گزشتہ 24 گھنٹوں میں مزید 2 افراد کے انتقال کرنے سے مرنے والوں کی تعداد 47 ہوگئی ہے، اس کے علاوہ وائرس سے مزید 5 مریض صحتیاب ہوئے ہیں جس سے صحت یاب ہونے والوں کی تعداد 581 ہے۔
مراد علی شاہ نے کہاکہ 24 گھنٹوں میں لیاری، صدر اور گارڈن میں کورونا کے 30 کیسز سامنے آئے ہیں جب کہ ضلع شرقی میں 16، کورنگی 6، ملیر 6، افغان بستی، نادرن بائی پاس، بلدیہ میں 8 اور وسطی کراچی کی کچی آبادیوں میں 11 کیسز رپورٹ ہوئے ہیں۔
وزیراعلیٰ کا کہنا تھا کہ کراچی کے وہ علاقے جو کیسز سے متاثر ہیں وہاں لاک ڈاؤن سخت کریں گے۔
واضح رہےکہ سندھ میں کورونا کے بڑھتے کیسز کی وجہ سے سخت لاک ڈاؤن ہے اور اس دوران ہر جمعہ 12 سے ساڑھے 3 بجے تک شہریوں کے گھروں سے نکلنے پر مکمل پابندی عائد ہوتی ہے جب کہ نماز جمعہ بھی گھروں میں پڑھنے کی ہدایات ہیں۔
[pullquote]کورونا وائرس کو شکست دینے سے متعلق سندھ سے اچھی خبر[/pullquote]
کراچی: سندھ میں کورونا کو شکست دینے سے متعلق ایک اور اچھی خبر سامنے آئی ہے جہاں تقریباً ڈھائی ہزار تبلیغی ارکان کے ٹیسٹ منفی آئے ہیں۔
ترجمان حکومت سندھ مرتضیٰ وہاب نے تصدیق کرتے ہوئے بتایا کہ 2889تبلیغیوں کے ٹیسٹ کیے گئے جن میں سے 437 مثبت اور 2452 منفی آئے ہیں۔
مرتضیٰ وہاب نے بتایا کہ ان تبلیغی جماعت کے افراد کو سندھ کے مختلف اضلاع میں رکھا گیا تھا اور ان تمام افراد کو پہلے 14 روز قرنطینہ میں بھی رکھا گیا تھا۔
ترجمان کا کہنا تھا کہ جن کے ٹیسٹ منفی آئے ہیں انہیں ہیلتھ ایڈوائزری پر عمل کرتے ہوئے گھروں کو روانہ کردیا جائے گا تاہم اس سے قبل انہیں متعلقہ ڈپٹی کمشنر سے سرٹیفیکٹ دیا جائے گا۔
انہوں نے مزید کہا کہ تمام ایس او پیز پر عملدرآمد لازمی ہوگا اور منفی ٹیسٹ کے حامل تبلیغیوں کو اپنے گھروں میں 14 روز قرنطینہ میں گزارنا ہوگا، احتیاطی تدابیر کے طور پر گھر کے دیگر افراد سے بھی سماجی دوری اختیار کرنا ہوگی۔
واضح رہے کہ سندھ میں کورونا وائرس کے مجموعی کیسز کی تعداد 2217 ہے اور 47 افراد جاں بحق ہوچکے ہیں۔
