اسلام آباد: صدر مملکت ڈاکٹر عارف علوی نے وفاقی دارالحکومت اسلام آباد کی مختلف مساجد کا دورہ کیا اور آئمہ کو خط لکھ کر مساجد میں 50 سال سے زائد عمر نمازیوں کی موجودگی کی نشاندہی کی۔
صدر مملکت کی جانب سے مختلف مساجد کے امام صاحبان کو تحریر کیے گئے خط میں کہا گیا ہے کہ گزشتہ روز وفاقی وزیر برائے مذہبی امور نور الحق قادری کے ہمراہ آپ کی مسجد میں حاضرا ہوا اور یہ دیکھ کر خوشی ہوئی کہ مسجد کی انتظامیہ نے احتیاطی تدابیر کے 20 نکات پر عملدرآمد کیا ہے۔
صدر مملکت ڈاکٹر عارف علوی کا اسلام آباد کی مساجد میں حاضری کے بعد امام صاحبان کو خط
خوشی ہوئی کہ مسجد کی انتظامیہ نے احتیاطی تدابیر کے 20 نکات پر عملدرآمد کیا ہے، صدر مملکت
البتہ ایک معاملہ کی طرف نشاندہی انتہائی ضروری ہے،صدر مملکت
— The President of Pakistan (@PresOfPakistan) April 25, 2020
انہوں نے مزید لکھا کہ ایک معاملے کی طرف نشاندہی انتہائی ضروری ہے کیونکہ غالباً 50 سال سے زائد عمر کے افراد بھی تراویح میں شامل تھے۔
صدر مملکت کا کہنا تھا کہ علماء اور حکومت کے اجماع میں 50 سال سے زیادہ عمر کے لوگوں سے مسجد میں نماز ادا نہ کرنے کی درخواست کی گئی لہٰذا مسجد کمیٹی کو چاہیے کہ ان بزرگوں کو قائل کریں تاکہ ہم اس وبا کو پھیلنے سے روک سکیں۔
خیال رہے کہ حکومت اور علمائے کرام کے درمیان رمضان المبارک میں مساجد کھولنے اور عبادات کیلئے 20 نکات پر اتفاق ہوا تھا جس کے تحت 50 سال سے زائد عمر والے افراد، بچے اور بیمار لوگ گھر میں ہی نماز ادا کریں گے۔
دوسری جانب ڈاکٹرز نے حکومت سے لاک ڈاؤن میں نرمی اور علمائے کرام سے مساجد کھولنے کے فیصلے پر نظرثانی کا مطالبہ کیا ہے۔
