کوہاٹ پولیس لائنز دھماکے سے متعلق بم ڈسپوزل یونٹ کی تفصیلی رپورٹ سینٹرل پولیس آفس کو ارسال کردی گئی۔
رپورٹ کے مطابق دھماکے کے مرکز کا تعین کرکے دھماکا خیز مواد کی نوعیت اور مقدار کا جائزہ لیا گیا جب کہ دھماکے کے گڑھے کا ظاہری قطر 6.6 فٹ بائی 11 فٹ اور گہرائی 4.6 فٹ تھی۔
رپورٹ میں بتایا گیا ہے کہ دھماکے میں استعمال ہونے والے دھماکا خیز مواد کی مجموعی مقدار 869 کلوگرام تھی جب کہ دھماکے میں استعمال ہونے والی گاڑی کی ابتدائی شناخت بھی کرلی گئی ہے۔
رپورٹ کے مطابق اسپیشل برانچ کی عمارت کے اندر سے غیر پھٹا ہوا دھماکا خیز مواد بھی برآمد ہوا، گراؤنڈ فلور سے 2 آئی ای ڈیز ج بکہ پہلی منزل سے ایک خودکش جیکٹ برآمد ہوئی، خودکش جیکٹ میں 4 آئی ای ڈیز نصب تھیں۔
بم ڈسپوزل یونٹ کی رپورٹ میں بتایا گیا ہے کہ دھماکے کے بعد حملہ آور پرانا پولیس لائنز کوہاٹ میں داخل ہوئے اور مسلح حملہ کیا جب کہ حملہ آور اسپیشل برانچ بلاک میں مضبوط مورچہ زن ہوگئے تھے۔
یاد رہے کہ 18 ستمبر کو کوہاٹ پولیس لائنز کی مسجد پر نماز جمعہ کے دوران خودکش حملہ کیا گیا تھا جس میں پولیس اہلکاروں سمیت 22 افراد شہید اور 100 سے زائد زخمی ہوئے تھے۔
