لیہ سے ملتان آنے والی ایک مسافر وین میں آتشزدگی کے نتیجے میں 5 افراد ہلاک جبکہ 20 سے زائد افراد جھلس کر زخمی ہوگئے۔
عینی شاہدین کے مطابق ہیڈ محمد والا میں چلتی ہوئی وین کے ایل پی جی سلینڈر میں آگ لگ گئی جسے وہاں پر موجود لوگوں نے اپنی مدد آپ کے تحت بجھانے کی کوشش کی۔
ریسکیو ذرائع کا کہنا ہے کہ اس مسافر وین میں خواتین اور بچوں سمیت ایک ہی خاندان کے 30 افراد سوار تھے جن میں 5 افراد ہلاک ہو گئے جبکہ 20 سے زائد افراد زخمی ہوئے۔
ریسکیو عملے نے موقع پر پہنچ پر زخمیوں اور لاشوں کو وین سے نکالا اور انہیں ملتان کے نشتر ہسپتال منتقل کیا۔
وین میں سوار تمام افراد کا تعلق ایک ہی خاندان سے ہے جو لیہ سے زیارت کے لیے ملتان جارہے تھے۔
ریسکیو ذرائع کا کہنا ہے کہ زخمیوں کو ملتان کے نشتر ہسپتال منتقل کیا گیا ہے جبکہ نشتر ہسپتال میں سانحہ احمد پور شرقیہ کے جھلسے ہوئے لوگ پہلے ہی برن سینٹر میں زیر علاج ہیں۔
اس واقعے سے ایک گھنٹہ قبل ہی ملتان کی ٹمبر مارکیٹ میں آتشزدگی کا واقعہ پیش آیا تھا تاہم اس میں کسی بھی جانی نقصان کی اطلاع موصول نہیں ہوئیں۔
فائر بریگیڈ کی 5 گاڑیاں ملتان کی ٹمبر مارکیٹ میں لگی آگ کو بجھانے میں مصروف تھیں۔
یاد رہے کہ عید الفطر سے ایک روز قبل بہاولپور کے علاقے احمد پور شرقیہ میں قومی شاہراہ پر پاکستان کی تاریخ کا سب سے دلخراش سانحہ پیش آیا جب ایک آئل ٹینکر میں آگ لگنے کےنتیجے میں 200 افراد ہلاک ہوگئے تھے۔
