بلوچستان میں فورسز کی کارروائیوں میں 21 دہشت گرد ہلاک ہوگئے جبکہ دہشت گردوں کے حملوں میں 14 جوان شہید ہوگئے۔
آئی ایس پی آر کے مطابق اتوار اور پیر کی درمیانی شب دہشت گردوں نے بلوچستان میں کئی سنگین کارروائیاں کرنے کی کوشش کی۔
دشمن اور مخالف قوتوں کے اشارے پر یہ بزدلانہ دہشت گردی کے واقعات بلوچستان کے پرامن ماحول اور ترقی کو تباہ کرنے کے لیے انجام دیے گئے جن کا ہدف زیادہ تر معصوم شہری تھے۔ خصوصاً موسیٰ خیل، قلات اور لسبیلہ کے اضلاع میں دہشت گردی میں کئی بے گناہ شہریوں نے شہادت پائی۔
موسیٰ خیل میں دہشت گردوں نے ایک بس کو روکا اور اس میں سوار ان بے گناہ شہریوں کو ظلم و بربریت کا نشانہ بنایا جو اپنی روزی کمانے کے لیے بلوچستان میں کام کر رہے تھے۔
سیکیورٹی فورسز اور قانون نافذ کرنے والے اداروں نے فوری طور پر جواب دیا اور کلیئرنس آپریشنز میں 21 دہشت گردوں کو ہلاک کر دیا گیا۔ تاہم آپریشنز کے دوران 14 بہادر سپوتوں نے بہادری سے لڑتے ہوئے جام شہادت نوش کیا جن میں 10 سیکیورٹی فورسز کے جوان اور 4 قانون نافذ کرنے والے اداروں کے اہلکار شامل ہیں۔
آئی ایس پی آر کے مطابق ان سنگین اور بزدلانہ کارروائیوں کے ماسٹر مائنڈ، معاونین اور سہولت کاروں کو انصاف کے کٹہرے میں لایا جائے گا۔
صدر آصف علی زرداری کا اظہار افسوس
صدر آصف علی زرداری نے بلوچستان میں کلیئرنس آپریشنز کے دوران جوانوں اور مختلف واقعات میں معصوم شہریوں کی شہادت پر اظہار افسوس کیا ہے ۔
صدرمملکت نے کہا ہے کہ دہشتگرد پوری قوم ، انسانیت اور ترقی کے دشمن ہیں، اُنہیں کیفر کردار تک پہنچائیں گے۔
صدر آصف علی زرداری نے مزید کہا ہے کہ قوم بہادر سیکیورٹی فورسز اور قانون نافذ کرنے والے اداروں کے ساتھ کھڑی ہے، ہم پوری قوم کی مدد سے دہشتگرد عناصر کے مذموم عزائم کو ناکام بنائیں گے۔
انہوں نے کہا کہ قوم شہدا کی احسان مند رہے گی اور ان کی قربانیوں کو سلام پیش کرتی ہے۔
صدر مملکت نے شہادت پانے والے جوانوں کی بہادری اور جذبہ قربانی کی تعریف، شہدا کیلے بلندی درجات اور اہلِ خانہ کیلیے صبر جمیل کی دعا کی۔
کسی بلوچ نے پنجابی کو نہیں بلکہ دہشت گردوں نے پاکستانیوں کو مارا ہے، وزیر اعلیٰ بلوچستان سرفراز بگٹی
کوئٹہ: وزیراعلیٰ بلوچستان سرفراز بگٹی نے کہا ہے کہ بلوچستان میں جو ہوا اُس میں کسی بلوچ نے کسی پنجابی کو نہیں بلکہ دہشت گردوں نے پاکستانیوں کو قتل کیا ہے، صوبے میں امن و امان کیلیے ہر صورت چیک پوسٹیں دوبارہ قائم کرنے کا فیصلہ کیا ہے اور اب کسی پروپیگنڈے میں نہیں آئیں گے۔
کوئٹہ میں پریس کانفرنس کرتے ہوئے وزیراعلیٰ نے کہا کہ ریاست کی رٹ چیلنج کرنے والوں کو کسی صورت معاف نہیں کریں گے اور اپنے شہریوں کی حفاظت سے ایک قدم پیچھے نہیں ہٹیں گے۔ انہوں نے کہا کہ یہ جنگ پاکستان کی ہے اور جو لوگ بی ایل اے کے ساتھ اظہار ہمدردی رکھتے ہیں وہ سرکاری ملازمت چھوڑ کر جائیں اور وہاں کھڑے ہوں۔ ہم اب کسی صورت بھی سوشل میڈیا کے پروپیگنڈے کا شکار نہیں ہوں گے اور صوبے کے امن و امان کیلیے اقدامات کریں گے۔
وزیراعلیٰ نے کہا کہ مسنگ پرنسز کے 84 فیصد کیسز حل ہوچکے ہیں، جب لاپتہ افراد کی تحریک کے رہنماؤں سے مذاکرات ہوں تو اُس میں آج تک لاپتہ افراد کی کوئی بات نہیں ہوئی، ان لوگوں کا ایک ہی مقصد ہے کہ ریاست کو ناکام دکھائیں اور دہشت گردوں کیلیے حمایتی افراد کو پیدا کریں۔
انہوں نے کہا کہ اب صوبے میں چیک پوسٹیں بنائیں گے اور انہیں کسی بھی صورت نہیں ہٹائیں گے کیونکہ ہم دہشت گردوں کی نقل و حرکت کی روک تھام کو ہر صورت ممکن بنائیں گے، اب کسی بھی سطح پر دہشت گردوں کے حامیوں کو بھی نہیں چھوڑا جائے گا۔
سرفراز بگٹی نے کہا کہ دہشت گردوں کو میڈیا اور کچھ حلقوں نے ناراض بلوچ قرار دیا جبکہ وہ بندوق اٹھا کر شہریوں کو قتل کررہے ہیں، اگر یہ سیاسی مسئلہ ہے تو ہم سیاسی جماعتوں سے بات کرنے کو تیار ہیں مگر دہشت گردوں سے کوئی بات نہیں کریں گے۔
انہوں نے کہا کہ ریاست پاکستان کے خلاف تین قسم کے لوگ متحرک ہیں، ایک مسلح گروہ، دوسرا سماجی طور پر اور تیسرا سوشل میڈیا پر متحرک ہے اور وہ جانے انجانے میں بے بنیاد پروپیگنڈے کا شکار ہے۔ وزیراعلیٰ نے کہا کہ ایک پاکستان توڑنے والے دہشت گرد بشیر زیب کے گھر والے سرکاری ملازمت کرتے تھے اور اُن کی ہمدردیاں بھی دہشت گردوں کے ساتھ تھیں۔
وزیراعلیٰ نے کہا کہ میں ایک بات واضح کرتا ہوں کہ دہشت گرد اور اُن کے سہولت کاروں کو ہم کسی صورت نہیں چھوڑیں گے اور ہم اب صوبے میں انٹرنیٹ کی فور جی سروس کی روک تھام کیلیے اقدامات کریں گے کیونکہ دہشت گرد حملہ کر کے فوٹیج بناتے اور فور جی سروس استعمال کرتے ہیں۔
سرفراز بگٹی نے کہا کہ ہم ایک بار پھر اُن لوگوں کو مذاکرات کی پیش کش کرتے ہیں جو اسلحہ پھینک کر قومی دھارے میں شامل ہونا چاہتے ہیں، اب اس چیز کو بھی دیکھا جائے گا کہ کوئی بھی ہتھیار پھینکنے والا شخص کس مقصد کے لیے ہتھیار پھینک رہا ہے، کیونکہ ایسا نہیں ہوسکتا کہ ہتھیار پھینک کر کوئی شخص علاج کروائے اور پھر صحت مند ہوکر پھر سے ریاست کے خلاف کھڑا ہوجائے۔
وزیراعلیٰ نے کہا کہ گزشتہ روز دہشت گردوں کے حملے میں ایف سی کے دس جوانوں نے جام شہادت نوش کیا، ہم اُن عظیم بہادر سپوتوں کی قربانی کو خراج تحسین پیش کرتے ہیں، ریاست ہمیشہ مظلوم کے ساتھ کھڑی ہوگی اور بلوچستان کے لوگ پہلے دن سے ان مسلح کارروائیوں کے خلاف جبکہ امن کے خواہش مند ہیں۔
