پاکستان تحریک انصاف(پی ٹی آئی) کی جانب سے سیاسی جماعتوں کے فنڈز کی جانچ پڑتال کی درخواست پر الیکشن کمیشن نے 19 سیاسی جماعتوں کو نوٹس جاری کردیے۔
چیف الیکشن کمشنر سکندر سلطان راجہ کی سربراہی میں پانچ رکنی بینچ نے پی ٹی آئی کی درخواست پر سماعت کی۔
پی ٹی آئی کی جانب سے وکیل شاہ خاور پیش ہوئے، اس موقع الیکشن کمیشن پولیٹکل فنانس ونگ کی رپورٹ الیکشن کمیشن میں پیش کر دی گئی۔
کمیشن نے رپورٹ پی ٹی آئی کے وکیل کے حوالے کرنے کی ہدایت کر دی، الیکشن کمیشن نے کہا کہ آپ رپورٹ کا جائزہ لے کر اپنے اعتراضات دائرکرسکتے ہیں۔
چیف الیکشن کمشنر نے کہا کہ 19 سیاسی جماعتوں کو نوٹس جاری کر رہے ہیں۔
الیکشن کمیشن نے کیس کی سماعت 24 جنوری تک ملتوی کر دی ۔