لندن: برطانیہ میں نئے وزیرِ اعظم اینڈی برنہم کی تعیناتی کے باوجود غیر قانونی تارکینِ وطن کی آمد روکنے کے حکومتی دعوے تاحال عملی نتائج نہ دے سکے۔
برطانوی حکومت کی جانب سے سخت اقدامات اور متنازع قوانین متعارف کرانے کے باوجود چھوٹی کشتیوں کے ذریعے انگلش چینل عبور کرنے والے غیر قانونی مہاجرین کا سلسلہ جاری ہے۔
تازہ واقعے میں 165 غیر قانونی تارکینِ وطن فرانس کے ساحل سے چھوٹی کشتی کے ذریعے انگلش چینل عبور کر کے برطانیہ پہنچ گئے۔ سیکیورٹی فورسز نے انہیں ڈوور منتقل کر کے تحویل میں لے لیا۔
رپورٹس کے مطابق 2018ء میں چھوٹی کشتیوں کے ذریعے غیر قانونی کراسنگ کا سلسلہ شروع ہونے کے بعد یہ ایک کشتی میں آنے والے افراد کی سب سے بڑی تعداد ہے۔ اس سے قبل 12 جولائی کو ایک کشتی میں 128 افراد کی آمد ریکارڈ کی گئی تھی۔
رپورٹس کے مطابق نئے وزیرِ اعظم اینڈی برنہم تاحال غیر قانونی تارکینِ وطن سے متعلق اپنی پالیسی واضح نہیں کر سکے، جبکہ ماضی کی حکومتیں بھی روانڈا اسکیم سمیت متعدد سخت اور متنازع اقدامات کے باوجود غیر قانونی کراسنگ روکنے میں کامیاب نہیں ہو سکیں۔
واضح رہے کہ رواں سال اب تک 13 ہزار سے زائد غیر قانونی تارکینِ وطن برطانیہ پہنچ چکے ہیں۔
