چین کے جنوبی صوبے ہائینان کا شہر سانیا دنیا بھر میں اپنے خوبصورت ساحلوں ، گرم موسم اور سیاحت کے لیے مشہور ہے، مگر گزشتہ چند برسوں میں اس شہر نے ایک نئی شناخت بھی حاصل کی ہے۔ اب سانیا صرف تفریح اور سیاحت کا مرکز نہیں رہا بلکہ یہ سائنس، تحقیق اور جدید ٹیکنالوجی کی دنیا میں بھی تیزی سے ابھرتا ہوا شہر بن چکا ہے۔ اس تبدیلی کے مرکز میں "یاژو بے سائنس اینڈ ٹیکنالوجی سٹی ” موجود ہے، جو چین کے مستقبل کے بڑے منصوبوں میں شمار کیا جاتا ہے۔ یہ منصوبہ اس بات کی مثال ہے کہ چین کس طرح روایتی ترقی سے آگے بڑھ کر علم، تحقیق اور جدت پر اپنی توجہ مرکوز کر رہا ہے۔
یاژو بے سائنس اینڈ ٹیکنالوجی سٹی سانیا کے مغربی حصے میں واقع ایک جدید سائنسی اور تحقیقی مرکز ہے۔ یہاں پہنچنے والا شخص سب سے پہلے اس جگہ کی خوبصورتی اور منصوبہ بندی سے متاثر ہوتا ہے۔ ایک طرف نیلا سمندر اور سرسبز ماحول دکھائی دیتا ہے جبکہ دوسری طرف جدید عمارتیں، تحقیقی مراکز اور یونیورسٹی کیمپس ایک نئی دنیا کا احساس دلاتے ہیں۔ یہ علاقہ دیکھ کر یوں لگتا ہے جیسے مستقبل کا کوئی جدید شہر آج ہی تعمیر کر دیا گیا ہو۔
چین نے اس سٹی کو صرف ایک ٹیکنالوجی پارک کے طور پر نہیں بنایا بلکہ اسے ایک مکمل سائنسی ماحولیاتی نظام کی شکل دی گئی ہے۔ یہاں مختلف شعبوں سے تعلق رکھنے والے سائنس دان، محققین، طلبا اور کاروباری افراد ایک ساتھ کام کرتے ہیں۔ اس منصوبے کا بنیادی مقصد جدید تحقیق کو معیشت اور صنعت سے جوڑنا ہے تاکہ نئی ایجادات براہِ راست ترقی کا حصہ بن سکیں۔
یاژو بے سائنس اینڈ ٹیکنالوجی سٹی کی سب سے اہم خصوصیت اس کی سمندری تحقیق ہے۔ چونکہ سانیا جنوبی بحیرہ چین کے قریب واقع ہے، اس لیے یہاں اوشن سائنس کے شعبے کو خصوصی اہمیت دی گئی ہے۔ یہاں قائم تحقیقی ادارے سمندری ماحولیات، آبی حیات، گہرے سمندر کی ٹیکنالوجی اور سمندری وسائل پر تحقیق کرتے ہیں۔ چین مستقبل میں سمندری معیشت کو مزید مضبوط بنانا چاہتا ہے، اس لیے یاژو بے کو اس وژن کا ایک اہم حصہ سمجھا جاتا ہے۔
یہاں کے تحقیقی مراکز میں جدید ترین آلات نصب ہیں جہاں سائنسدان سمندر میں موجود قدرتی وسائل، موسمیاتی تبدیلیوں اور سمندری ماحول کے تحفظ پر کام کرتے ہیں۔ چین کے کئی نوجوان محققین اس شہر میں آ کر اپنی تحقیق کو عملی شکل دے رہے ہیں۔ یہی وجہ ہے کہ یاژو بے آہستہ آہستہ چین کے بڑے سائنسی مراکز میں شمار ہونے لگا ہے۔
اس کے علاوہ زرعی تحقیق بھی اس سٹی کی ایک اہم پہچان ہے۔ چین کی آبادی بہت زیادہ ہے اور مستقبل میں غذائی تحفظ ایک بڑا مسئلہ بن سکتا ہے، اسی لیے جدید زرعی ٹیکنالوجی پر بھرپور توجہ دی جا رہی ہے۔ یاژو بے میں بیجوں کی تحقیق کے بڑے مراکز قائم کیے گئے ہیں جہاں نئی اقسام کے بیج تیار کیے جاتے ہیں تاکہ فصلوں کی پیداوار بہتر بنائی جا سکے۔ یہاں سائنس دان ایسی فصلوں پر تحقیق کرتے ہیں جو موسمی تبدیلیوں کا بہتر مقابلہ کر سکیں اور کم وسائل میں زیادہ پیداوار دے سکیں۔
یاژو بے سائنس اینڈ ٹیکنالوجی سٹی صرف سائنس دانوں تک محدود نہیں بلکہ یہاں تعلیم کے میدان میں بھی تیزی سے ترقی ہو رہی ہے۔ چین کی کئی بڑی جامعات یہاں اپنے تحقیقی مراکز قائم کر چکی ہیں۔ نوجوان طلبا کو جدید لیبارٹریوں میں کام کرنے کے مواقع ملتے ہیں جبکہ بین الاقوامی تعاون کے دروازے بھی کھل رہے ہیں۔ غیر ملکی ماہرین اور طلبا بھی یہاں تحقیق کے لیے آتے ہیں جس سے اس شہر کی عالمی اہمیت مزید بڑھ رہی ہے۔
اس منصوبے کا ایک دلچسپ پہلو خلائی ٹیکنالوجی سے اس کا تعلق بھی ہے۔ ہائینان صوبہ چین کے خلائی پروگرام کے لیے اہم سمجھا جاتا ہے اور یہاں موجود تحقیقی ادارے سیٹلائٹ ٹیکنالوجی، ڈیجیٹل سسٹمز اور جدید مواصلاتی منصوبوں پر بھی کام کر رہے ہیں۔ نوجوان انجینئرز اور سائنسدانوں کے لیے یہ جگہ کسی خواب سے کم نہیں جہاں انہیں جدید ٹیکنالوجی کے ساتھ کام کرنے کا موقع ملتا ہے۔
یہاں کی ترقی میں ماحولیات کو بھی اہمیت دی گئی ہے۔ جدید شہروں پر اکثر یہ تنقید کی جاتی ہے کہ وہ قدرتی ماحول کو نقصان پہنچاتے ہیں، مگر یہاں صورتحال مختلف نظر آتی ہے۔ سڑکوں کے کنارے درخت، کھلے پارک، سائیکل ٹریک اور صاف فضا اس بات کا احساس دلاتے ہیں کہ ترقی اور ماحول کو ایک ساتھ لے کر چلنے کی کوشش کی جا رہی ہے۔ یہی وجہ ہے کہ یہاں رہنے والے لوگ اسے ایک پرسکون اور جدید شہر قرار دیتے ہیں۔
معاشی اعتبار سے بھی یاژو بے سائنس اینڈ ٹیکنالوجی سٹی بہت اہم ہے۔ چین چاہتا ہے کہ مستقبل میں اس کی معیشت صرف روایتی صنعتوں پر انحصار نہ کرے بلکہ سائنس اور جدت بھی ترقی کا بنیادی ذریعہ بنیں۔ اسی لیے اس منصوبے میں بڑی سرمایہ کاری کی گئی ہے۔ نئی ٹیکنالوجی کمپنیاں، تحقیقی ادارے اور اسٹارٹ اپس یہاں تیزی سے آ رہے ہیں، جس سے روزگار کے نئے مواقع بھی پیدا ہو رہے ہیں۔
یاژو بے سائنس اینڈ ٹیکنالوجی سٹی صرف ایک جدید منصوبہ نہیں بلکہ چین کے مستقبل کی ایک جھلک ہے۔ یہ جگہ ظاہر کرتی ہے کہ آج کا چین صرف تجارت اور صنعت تک محدود نہیں بلکہ وہ سائنس، تحقیق اور تعلیم کے ذریعے دنیا میں اپنی نئی شناخت بنانا چاہتا ہے۔ سانیا کے خوبصورت ساحلوں کے درمیان قائم یہ جدید شہر دراصل اس نئے چین کی تصویر پیش کرتا ہے جو مستقبل کی دنیا میں علم اور ٹیکنالوجی کی طاقت سے آگے بڑھنے کا خواب دیکھ رہا ہے۔
