قلندر مومند صاحب کہا کرتے تھے کہ پشتو کی نشوونما اور ترقی کے لیے ضروری ہے کہ ہم مسلکی اور پیشہ ور لکھاری پیدا کریں۔ پشتو صحافت نے بے شمار صحافی پیدا کیے؛ بعض نے پشتو صحافت کو آگے بڑھایا، کچھ عالمی میڈیا کا حصہ بنے اور کچھ نے ملکی میڈیا کے مختلف اداروں میں اپنا مقام بنایا۔ لیکن پیشہ ور لکھاری حقیقی معنوں میں اسی وقت پیدا ہوں گے جب پشتو کے پرنٹ میڈیا میں روزنامے، ہفت روزے، پندرہ روزہ اور ماہانہ رسائل مستقل بنیادوں پر شائع ہوں۔
شکر ہے کہ آج بھی بعض رسائل اور دو روزنامے موجود ہیں۔ ان میں کچھ پیشہ ور لکھاری ہیں اور کچھ خدمت کے جذبے سے قلم چلا رہے ہیں۔ الیکٹرانک میڈیا اور پھر سوشل میڈیا کی آمد کے ساتھ پرنٹ میڈیا کا اثر یقیناً کم ہوا ہے، لیکن وہ ختم نہیں ہوا اور نہ کبھی ختم ہوگا؛ کیونکہ ہوا کی باتیں ہوا میں تحلیل ہوجاتی ہیں، مگر تحریر باقی رہتی ہے۔ اسی لیے پشتو ٹپہ میں انگلیاں قلم سے مخاطب ہوکر کہتی ہیں:
انگلیاں قلم کے لیے رو پڑیں
تو باقی رہے گا، ہم تو مٹی ہوجائیں گے۔
باچا خان کا یہ دلی ارمان تھا کہ پشتونوں کا اپنا ایک خودمختار روزنامہ ہونا چاہیے۔ اس مقصد کے لیے انہوں نے ایک رقم بھی مخصوص کر رکھی تھی۔ ان کا کہنا تھا کہ یہ رقم ایک ٹرسٹ کے ذریعے محفوظ ہوگی اور یہی ٹرسٹ پشتونوں کا اپنا روزنامہ جاری کرے گا۔ باچا خان نے یہ بات ایک انٹرویو میں جناب غنی خٹک سے کہی تھی، جو کہیں شائع بھی ہوئی ہے۔ آج باچا خان کے نام سے ٹرسٹ موجود ہے اور اس کے تحت "پښتون” رسالہ بھی شائع ہوتا ہے، لیکن صورتِ حال کچھ یوں ہے:”آدم نہیں، صرف اس کی خوشبو باقی ہے۔”
کچھ عرصے تک "شہباز” اخبار بھی اردو اور پشتو دونوں زبانوں میں شائع ہوتا رہا، لیکن اب نظر نہیں آتا۔ پشتونوں کا ایک انگریزی اخبار بھی تھا۔ اس پر الزامات لگائے گئے اور جناب رحمت شاہ آفریدی کو اس کا ذمہ دار ٹھہرایا گیا۔ اخبار یوں ختم ہوگیا جیسے سرے سے موجود ہی نہ تھا۔ رحمت شاہ آفریدی اس صدمے سے بہت متاثر ہوئے، دل کے عارضے میں مبتلا ہوئے اور وفات پاگئے۔ افسوس کہ پشتونوں نے بھی انہیں یوں بھلا دیا جیسے وہ کبھی اس دنیا میں موجود ہی نہ تھے۔
پیر سید سفید شاہ ہمدرد اور سلطان محمد صابر محنت کش طبقے سے تعلق رکھنے والے صحافی تھے۔ وہ پشاور اور کوئٹہ کے ریڈیو اسٹیشنوں میں اسکرپٹ رائٹر رہے اور ساتھ ہی پرنٹ صحافت سے بھی وابستہ رہے۔ بالآخر پیر سید سفید شاہ ہمدرد اس کوشش میں کامیاب ہوئے کہ "الوحدت” کو اردو اور پشتو کی مشترکہ شکل سے مکمل پشتو اخبار "وحدت” میں تبدیل کردیں۔سلطان محمد صابر کوئٹہ سے پشاور آئے اور انہوں نے ہفت روزہ "هېواد” جاری کیا۔ پیر سید سفید شاہ صاحب نے "وحدت” کی کامیابی کے لیے دن رات ایک کردیا۔ شکر ہے کہ "وحدت” کامیاب ہوا اور آج بھی اپنا سفر جاری رکھے ہوئے ہے۔ جیسا کہ پہلے عرض کیا، روزنامہ "وحدت” نے بہت سے صحافیوں کی تربیت کی اور عملی صحافت کی ایک نرسری کی حیثیت اختیار کرلی۔
جب "هېواد” ہفت روزہ تھا تو بہت اچھا چل رہا تھا۔ پشاور صدر میں مغربی تھانے کے سامنے اس کا دفتر تھا۔ کبھی کبھی ہم وہاں جاتے اور راتیں بھی وہیں گزارتے۔ بعد میں "فرنٹیئر پوسٹ” نے صابر صاحب سے کہا کہ "هېواد” ہمیں دے دیں، ہم اسے روزنامہ بناتے ہیں؛ آپ اس کے ایڈیٹر ہوں گے اور پالیسی بھی آپ ہی کی ہوگی۔”هېواد” کی پالیسی اسلام، پشتو اور پاکستان تھی؛ البتہ افغانستان کے معاملے میں یہ ظاہر شاہ کا حامی تھا۔ "وحدت” نے اپنی پالیسی نسبتاً آزاد رکھی تھی۔آخرکار "هېواد” روزنامہ بند ہوگیا اور سلطان محمد صابر اسلام آباد آگئے۔ یہاں انہوں نے پہلے اردو، پشتو اور انگریزی تین زبانوں میں "دی پیپلز ویکلی” جاری کیا اور بعد میں ہفت روزہ "هېواد اسلام آباد” شائع کیا۔ میں بھی مارچ 1999ء سے 2004ء تک اس ہفت روزہ "هېواد اسلام آباد” میں ان کے ساتھ مدیر کی حیثیت سے کام کرتا رہا۔
یہاں ایک بات کی وضاحت ضروری سمجھتا ہوں۔ جب "هېواد” روزنامہ بند ہوا اور سلطان محمد صابر اسلام آباد آئے تو ادبی اور صحافتی حلقوں میں یہ بات عام تھی کہ صابر صاحب نے یہ اخبار دس لاکھ روپے میں فروخت کردیا ہے، لیکن حقیقت ایسی نہیں تھی۔انہی دنوں بی بی سی پشتو سروس نے بھی اس سلسلے میں انٹرویو کے لیے رابطہ کیا۔ میں نے صابر صاحب سے کہا کہ یہ اچھا موقع ہے، اس معاملے کی حقیقت واضح کردیں۔ انٹرویو میں بھی ان سے پوچھا گیا کہ لوگ کہتے ہیں آپ نے یہ اخبار دس لاکھ روپے میں فروخت کیا ہے۔ صابر صاحب نے جواب دیا:”یہ سراسر جھوٹ ہے۔”
انہوں نے بتایا کہ رحمت شاہ آفریدی نے ان سے کہا تھا کہ پالیسی آپ کی ہوگی، آپ ایڈیٹر ہوں گے اور "هېواد” کا عملہ بھی آپ کے ساتھ ہوگا۔ ایک دو سال تک وہ لوگ ڈمی اخبار چلاتے رہے۔ میں انہیں بار بار کہتا رہا کہ اصل اخبار میدان میں لائیں، لیکن وہ ڈمی اخبار ہی نکالتے رہے۔ آخرکار انہوں نے اسے بند کردیا۔اس کی وجہ کے بارے میں صابر صاحب نے بی بی سی کو بتایا کہ اس وقت "هېواد” کی پالیسی حکمت یار اور بعض دوسرے لوگوں کے نقطۂ نظر سے متصادم تھی۔ "هېواد” افغانستان میں ظاہر شاہ کا حامی تھا، جبکہ وہ لوگ یہ نہیں چاہتے تھے۔
صابر صاحب کہتے تھے کہ انہوں نے یہ تمام باتیں اپنی اردو خودنوشت میں بھی بیان کی ہیں۔ جب میں نے "هېواد” کو "فرنٹیئر پوسٹ” کو دینے کی کوشش کی تو میرے دوست فرحت اللہ بابر، ایاز داؤدزی، مجید اللہ خلیل اور دوسرے ساتھیوں نے کہا: ایسا نہ کرو؛ یہ لوگ اخبار چلانے کے لیے نہیں بلکہ بند کرنے کے لیے لے رہے ہیں۔تاہم ہفت روزہ "هېواد” صحیح سمت میں چل رہا تھا۔ صابر صاحب کی "فرنٹیئر پوسٹ” کے ذمے تنخواہیں بھی واجب الادا تھیں۔ آخرکار وہ اسلام آباد میں صحافیوں کی عدالت میں گئے اور اس عدالت کے ذریعے کچھ نہ کچھ رقم حاصل کرنے میں کامیاب ہوئے۔
اس وقت وہ لوگ بھی مشکلات سے دوچار تھے اور صابر صاحب بھی عمر رسیدہ اور کمزور ہوچکے تھے۔ قدرت نے ہمیں ان کی خدمت کا موقع عطا کیا۔ صابر صاحب علم و فضل کے آدمی اور نہایت اچھے انسان تھے۔ سیاسی، سماجی، علمی اور ادبی شخصیات سے ان کے گہرے روابط تھے۔ سیاسی شخصیات اور اعلیٰ سرکاری افسران ان کی بہت قدر و عزت کرتے تھے۔ہماری گفتگو پیشہ ور لکھاریوں اور صحافت کے موضوع پر ہورہی تھی۔ 2003ء میں اے وی ٹی خیبر چینل شروع ہوا۔ اس زمانے میں ہمارے معاشرے میں مذہبی انتہاپسندی تیزی سے ابھر رہی تھی۔ افغانستان میں 1996ء میں طالبان کی حکومت بھی مذہبی سخت گیری کی بنیاد پر قائم ہوئی تھی۔ اس صورتِ حال کے اور بھی بہت سے پہلو ہیں، لیکن ہمارا مقصد پشتو صحافت کے تناظر میں پیشہ ورانہ صحافت کی ترقی کا جائزہ لینا ہے۔
اس صورتِ حال اور پھر نائن الیون کے بعد دہشت گردی کے خلاف جدوجہد میں اے وی ٹی خیبر نے اہم کردار ادا کیا۔ پشاور یونیورسٹی اور ملک کی دوسری یونیورسٹیوں سے فارغ التحصیل جرنلسٹوں کو اے وی ٹی خیبر نے اپنے دامن میں جگہ دی۔ صحافت کی جو نرسری پہلے "وحدت” نے قائم کی تھی، بعد میں یہی کردار اے وی ٹی خیبر نے ادا کیا۔ قومی مین اسٹریم میڈیا میں آج بھی ایسے بہت سے صحافی موجود ہیں جن کی بنیادی تربیت اسی چینل میں ہوئی۔میرا اپنا ٹیلی ویژن سے پہلا تعلق 1980ء کی دہائی میں ایک مشاعرے کے کمپیئر کی حیثیت سے ہوا۔ اس کے بعد کوئٹہ ٹیلی ویژن کے دو تین مشاعروں اور مباحثوں میں بھی شریک ہوا۔ تاہم اے وی ٹی خیبر میں مختلف پروگراموں، مشاعروں کی میزبانی اور اینکرنگ بھی کی۔ ہماری سب سے معروف اور طویل عرصے تک جاری رہنے والی نشریات میں "د پښتو ادب تاریخ” شامل تھی۔
ہم نے خیبر چینل کے جتنے بھی پروگراموں میں شرکت کی، کم یا زیادہ، ہمیں کسی نہ کسی صورت میں معاوضہ بھی دیا جاتا تھا۔ یہ اس دور کی پیشہ ورانہ میڈیا کی ایک اہم علامت تھی کہ ادیب، شاعر اور میزبان کے کام کی مالی قدر بھی تسلیم کی جاتی تھی۔بعد میں "خیبر نیوز” اور "کے ٹو” چینلز بھی خیبر چینل نیٹ ورک کا حصہ بنے۔ اسی طرح "مشرق ٹی وی” بھی نیوز چینل کے طور پر سامنے آیا اور جرنلزم میں ماسٹرز کرنے والے نوجوان لڑکوں اور لڑکیوں کو اس چینل میں کام کرنے کے مواقع فراہم ہوئے۔ اسی طرح "پشتو-1” کے نام سے بھی ایک چینل شروع ہوا، جسے بعد میں خیبر چینل نے حاصل کرلیا۔ بعد ازاں اردو چینل "ہم” آیا، جسے ہم "ہم پشتو-1” کہا کرتے تھے۔
ان چینلز میں بہت سے ایسے پشتون نوجوان تھے جنہوں نے جرنلزم کی تعلیم حاصل کی تھی، لیکن پشتو زبان کے استعمال میں انہیں مشکلات پیش آتی تھیں۔ بعد میں انہوں نے افغانستان میں رائج بعض اصطلاحات کا استعمال بھی شروع کردیا، جس سے صورتِ حال مزید پیچیدہ ہوگئی۔ بہرحال، ان چینلز نے پشتو زبان، ثقافت اور ادب کی ترقی میں اپنا کردار ادا کیا ہے، جس سے انکار نہیں کیا جاسکتا۔اس زمانے میں "افغان ٹی وی” اسلام آباد میں پہلا ڈش چینل تھا، بعد میں اس نے ڈیجیٹل چینل بھی شروع کیا۔ تاہم ان ذرائع ابلاغ کے مالی اور انتظامی مسائل بھی اپنی جگہ موجود تھے۔
روزنامہ "وحدت” پشاور کے ڈیجیٹل چینل "وحدت ڈیجیٹل” کا تجربہ کامیاب نہ ہوسکا۔ اب جناب ایمل ولی خان نے "Fact are Fact” کے نام سے ایک ڈیجیٹل چینل شروع کیا ہے۔ یہ اچھی بات ہے، اللہ تعالیٰ اسے کامیاب کرے؛ لیکن اس کے ساتھ ساتھ "شہباز” اخبار کو اردو اور پشتو دونوں زبانوں میں پیشہ ورانہ بنیادوں پر دوبارہ جاری کرنا بھی بہت ضروری ہے۔ڈیجیٹل چینل بھی پیشہ ورانہ بنیادوں پر چلایا جانا چاہیے؛ کیونکہ صرف ٹیکنالوجی تبدیل کرنے سے صحافت کے مسائل حل نہیں ہوتے۔ صحافت کی اصل بنیاد آج بھی پیشہ ورانہ تربیت، تحقیق، اداریاتی معیار اور لکھاری و صحافی کے کام کا احترام ہے۔
پشتو زبان کے عظیم محقق، نقاد، شاعر اور ادیب ہمیش خلیل صاحب نے بڑی مشکل سے "باگرام” ڈیکلریشن حاصل کیا تھا۔ اس زمانے میں اخبار کا ڈیکلریشن اسلام آباد سے جاری ہوتا تھا۔ ہمیش خلیل صاحب اکثر اسلام آباد آتے اور غنی خٹک صاحب کے ہاں قیام کرتے۔ خٹک صاحب مجھے بھی اطلاع کردیتے، پھر ہم رات گئے تک محترم استاد کی گفتگو سنتے رہتے۔انہیں ڈیکلریشن مل گیا۔ کچھ عرصے تک انہوں نے اخبار نکالنے کی کوشش کی، لیکن آخرکار اخبار بند ہوگیا اور ڈیکلریشن کسی اور کو دے دیا گیا۔
اسی عرصے میں "جرس” کراچی، "پلوشہ” کراچی، "تنظیم” صوابی، "ښکلا” پشاور اور بہت سے دوسرے رسائل بھی شائع ہوئے۔ یہ وہ زمانہ تھا جب پشتو لکھنے والوں کو اظہار اور تجربے کے نسبتاً زیادہ مواقع میسر تھے۔ چنانچہ ہماری بات ایک بار پھر قلندر مومند صاحب کے اسی قول کی طرف لوٹتی ہے: پیشہ ور لکھاری اسی وقت پیدا ہوں گے جب پشتو میں رسائل، ہفت روزے اور روزنامے زیادہ ہوں گے۔آج اگر ہم پشتو میں لکھیں تو ہمارے سامنے تقریباً ایک ہی "وحدت” ہے، اور اس پر تحریروں کا بہت زیادہ بوجھ ہے۔ ہم جو تحریر بھیجتے ہیں، اس کی اشاعت تک کبھی کبھی اس کی تازگی اور وقت کی اہمیت ختم ہوچکی ہوتی ہے۔ اسی وجہ سے اب مجبوری کے تحت پشتو کے ساتھ اردو میں بھی لکھتے ہیں۔ جب پشتو تحریر شائع ہوتی ہے تو اردو میں اس کی اشاعت کو کئی دن گزر چکے ہوتے ہیں۔
یہ صورتِ حال صرف ایک لکھاری کا مسئلہ نہیں یہ پشتو زبان کی فکری اور ادبی ترقی کا مسئلہ ہے۔ کوئی زبان اسی وقت زندہ، متحرک اور ترقی پذیر رہ سکتی ہے جب اس کے لیے روزنامے، ہفت روزے، پندرہ روزہ اور ماہانہ رسائل، ادبی جرائد اور پیشہ ورانہ ڈیجیٹل پلیٹ فارم موجود ہوں۔پشتو صحافت صرف خبر پہنچانے کا ذریعہ نہیں؛ یہ پشتو کے پیشہ ور لکھاری، شاعر، نقاد اور فکری انسان کی تربیت گاہ بھی ہے۔ اگر ہم واقعی چاہتے ہیں کہ پشتو میں پیشہ ور لکھاری پیدا ہوں تو ان کے لیے لکھنے، شائع ہونے، تنقید اور مکالمے کے وسیع میدان پیدا کرنا ہوں گے۔
صرف سوشل میڈیا کی پوسٹوں سے کوئی زبان مکمل طور پر پروان نہیں چڑھ سکتی؛ زبان کو اداروں، رسائل، اخبارات، پیشہ ور مدیران اور تربیت یافتہ صحافیوں کی بھی ضرورت ہوتی ہے۔ کل کے تجربات سے اگر ہم آج کچھ سیکھ سکتے ہیں تو وہ یہ ہے کہ "وحدت” نے صحافیوں کو تربیت دی، اے وی ٹی خیبر نے نئی نسل کو میدان فراہم کیا، دوسرے ٹیلی ویژن چینلز نے بھی تربیت کے اس سلسلے کو آگے بڑھایا؛ اب ڈیجیٹل میڈیا کی باری ہے کہ وہ یہ ذمہ داری پیشہ ورانہ بنیادوں پر ادا کرے۔اگر پشتو صحافت کے کل کے تجربات کو آج کے ڈیجیٹل امکانات کے ساتھ جوڑ دیا جائے تو ممکن ہے کہ وہ خواب، جو قلندر مومند صاحب نے "پیشہ ور لکھاری” کے بارے میں دیکھا تھا، آنے والی نسل کے ہاتھوں حقیقت کا روپ دھار لے۔
